SQO-da aı bastalǵaly bes myńnan astam adam JRVI juqtyrdy

PETROPAVL. KAZINFORM – Soltústik Qazaqstan oblysynda jiti respıratorlyq vırýsty ınfektsııa juqtyrǵandardyń 69,8% - 14 jasqa deıingi balalar.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, ótken aptada oblysta JRVI-di juqtyrýdyń 2340 jaǵdaıy tirkeldi.

- JRVI, tumaýmen kúrestiń tıimdi joly – vaktsınatsııa. Oblysta 23 qyrkúıekten bastap tumaýǵa qarsy ımmýndaý naýqany bastaldy. Táýekel tobyna jatatyn adamdar úshin reseılik «Grıppol plıýs» vaktsınasynyń 60 myń dozasy satyp alyndy.

Medıtsına qyzmetkerleri, medıtsınalyq uıymda dıspanserlik esepte turǵan balalar, sábıler, balalar úıleriniń tárbıelenýshileri, qarttar úıleriniń kontıngenti, epıdemıologııalyq kórsetkishteri bar adamdar tirkelgen jeri boıynsha emhanada tegin ekpe alady, - deıdi SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasov.

Búgingi tańda táýekel tobyna jatatyn adamdardyń 32 myńyna, sonyń ishinde 4013 balaǵa ekpe egildi.

- JRVI-ǵa jeńil-jelpi qaraýǵa bolmaıdy. Onyń negizgi belgileri - joǵary temperatýra, jalpy ıntoksıkatsııa, álsizdik, tamaq aýrýy, muryn bitelýi. Alǵashqy belgileri baıqalǵan kezde dereý medıtsınalyq kómekke júginý qajet, dárigerdi úıge shaqyrý kerek, aýrýdy taratpaý úshin naýqas balany balabaqshaǵa nemese mektepke jibermeý kerek. Aýrý durys emdelmeı asqynǵan jaǵdaıda ókpeniń qabynýyna ákelýi múmkin, - deıdi Arman Kúshbasov.

Mamannyń aıtýynsha, JRVI men tumaýdyń aldyn alý úshin bólmeni kún saıyn jeldetý, qoldy muqııat jýý, antıseptık quraldardy paıdalaný, adamdar kóp jınalatyn is-sharalardan bas tartý ne betperde taǵý kerek. Sondaı-aq ımmýnıtetti nyǵaıtyp, ýaqytynda uıyqtap, durys tamaqtanǵan jón.

Buǵan deıin Almatyda JRVI juqtyrǵandardyń sany 20 myńǵa jaqyndaǵanyn jazǵan edik.