SQO-da avtojoldy jóndeýge bólingen qarajatty urlaǵandar 7 jylǵa sottaldy
Soltústik Qazaqstan oblysynyń prokýrorlary avtomobıl joldary salasyndaǵy zańbuzýshylyqtardy anyqtady, dep habarlaıdy Kazinform.
Petropavl qalasynyń turǵyn úı-kommýnaldyq sharýashylyq bóliminiń laýazymdy adamdary qalanyń 20 kóshesin jóndeý úshin oryndalǵan jumys aktilerine qol qoıǵan. Olar is júzinde belgilengen standart normalaryna sáıkes kelmegen.
«Osy laýazymdy tulǵalar zań talaptaryna qaıshy, merdigerlik uıymdardan asfaltbeton qospasyna sáıkestik sertıfıkatynsyz, oblys ortalyǵynyń kóshelerin aǵymdaǵy jóndeý jumystaryn qabyldaǵan. Qadaǵalaý organynyń aktisi boıynsha jol berilgen buzýshylyqtardy joıý, sondaı-aq laýazymdy adamdardy belgilengen jaýapkershilikke tartý jóninde sharalar qabyldandy. Ǵ.Músirepov aýdanynda 2022 jyly prokýrorlyq tekserispen avtomobıl joldaryn jóndeýge bólingen bıýdjet qarajatyn urlaý faktisi anyqtaldy.Aýdannyń TKSh bóliminiń basshysy «Memlekettik satyp alý týraly» QR zańynyń talaptaryna qaıshy, avtomobıl joldaryn jóndeýge 427 mln teńge kóleminde aqy tólengen, ol boıynsha jumystar naqty oryndalmaǵan», - delingen SQO prokýratýrasy habarlamasynda.
Osylaısha qadaǵalaý organynyń materıaldaryna sáıkes SQO boıynsha Ekonomıkalyq tergep-tekserý departamenti Turǵyn úı-kommýnaldyq sharýashylyq bóliminiń basshysyna, merdiger uıymnyń dırektoryna jáne tehnıkalyq qadaǵalaý sarapshysyna qatysty bıýdjet qarajatyn urlaý faktisi boıynsha sotqa deıingi tergep-tekserýdi tirkedi.
Osy jyldyń 10 qazanynda Petropavl qalalyq sotynyń úkimimen atalǵan adamdar Qylmystyq kodekstiń 189-babynyń 4-tarmaǵy 2-tarmaqshasymen qarastyrylǵan qylmystyq quqyq buzýshylyq jasaǵany úshin kináli dep tanylyp, árqaısysyna 7 jyl merzimge bas bostandyǵynan aıyrý túrindegi jaza taǵaıyndaldy.
