SQO-da avtokólikterdiń órtenýi jıilep ketken
PETROPAVL. QazAqparat - Jyldyń basynan beri Soltústik Qazaqstan oblysynda avtokóliktegi 43 órt tirkelgen, dep habarlaıdy SQO TJD baspasóz qyzmeti.
Avtokólik ıelerine tilsizdiń jaýdyń tıgizgen materıaldyq zalaly 21 mln teńgeni qurady. Qutqarýshylar órt sanynyń artyp jatqandyǵyn aıtýda. Ótken jyly osy kezeń ishinde 28 órt bolǵan. Tek eski emes, sonymen qatar kóptegen elektr jabdyqtarymen jabdyqtalǵan zamanaýı avtomobılder de otqa oranady.
«Órttiń shyǵýynyń 80%-y avtomobıldiń elektr symdar júıesindegi aqaý saldarynan bolǵan. Janarmaı júıesiniń zaqymdanýy saldarynan da órt shyǵyp jatatyn kezder az bolmaıdy. Sondaı-aq, júrgizýshiler mashınada órt shyqqanda ony qalaı óshirý kerektigin bilmeıdi», - dep atap ótti SQO TJD-nyń baspasóz qyzmeti.
Avtoáýesqoılardyń keıbiri kóliginde órt sóndiretin quraldy saqtamaıdy, al bolǵan jaǵdaıda da órtti durys óshirmeıdi nemese ony qoldanýdy múldem bilmeıdi.
Jyldyń basynan beri oblysta 404 órt bolǵan, onyń keltirgen materıaldyq zalaly 59 mln teńgeni quraǵan. 13 adam tilsiz jaýdyń qurbanyna aınalsa, 12 zardap shegýshi ártúrli deńgeıdegi jaraqat alǵan.
