SQO-da aýylǵa qatysty baǵdarlamany júzege asyrýdaǵy problemalar talqylandy
PETROPAVL. QazAqparat – Soltústik Qazaqstan oblysynda «Aýyl» Halyqtyq-demokratııalyq patrıottar partııasynyń fılıaly «Aýyl – El besigi» baǵdarlamasyn júzege asyrýdyń túıitkildi máseleleri» taqyrybynda kezdesý ótkizdi, dep habarlaıdy QazAqparat tilshisi.
Bul kezdesýge «Aýyl» Halyqtyq-demokratııalyq patrıottar partııasynyń Tóraǵasy, QR Parlamenti Senatynyń depýtaty Álı Bektaevtyń depýtattyq saýaly negiz bolǵan. Partııa kóshbasshysynyń pikirinshe, «Aýyl – el besigi» baǵdarlamasy eki jyldan beri júzege asyp jatqanymen, negizgi jumysyn atqara almaı otyr. Bul joba túrli baǵdarlamalardyń basyn biriktirip, jaýapty uıymdardyń jumysyn úılestirý arqyly, júıeli jumys isteýi qajet edi.
«Baǵdarlamany jetildirý qajet. Ol qazir «Óńirlerdi damytýdyń 2020-2025 jyldarǵa arnalǵan memlekettik baǵdarlamasynyń bir bóligi ǵana sekildi. Aýylǵa qatysty másele kóp qoı. Sonyń biri – jumys kúshiniń joqtyǵy. Jastar qara jumysty istegisi kelmeıdi. Munyń bári durys tárbıeniń joqtyǵynan. Baǵdarlamany jasaǵanda osynyń bárin negizge alý qajet edi», - deıdi «Aýyl» partııasynyń SQOF tóraǵasy Temirǵalı Ábilmájinov.
Partııa músheleriniń aıtýynsha, mundaı kezdesýler barlyq óńirlerde uıymdastyrylmaq.
«Búgin Aqqaıyń aýdany Shaǵalaly eldimekeninde aýylsharýashylyq tájirıbelik stansasy jumysshylarymen jáne aýdandyq partııa uıymdarynyń basshylarymen kezdesip otyrmyz. Búgingi dóńgelek ústelge partııa tóraǵasynyń orynbasary Qaırat Aıtýǵanov qatysty. Halyqtyń oıyn bilip, usynystaryn tyńdaımyz. Bizdiń pikirimizshe, «Aýyl – el besigi» jobasyna aýyl turǵyndary úshin áleýmettik tıimdiligi joǵary «Eńbek», «Bıznestiń jol kartasy – 2025», «Nurly jol», «Nurly jer» sııaqty memlekettik baǵdarlamalardy úılestirý qajet edi», - deıdi Temirǵalı Ábilmájinov.
Buǵan deıin SQO-da «Aýyl – el besigi» memlekettik baǵdarlamasy aıasynda bıyl 32 jobanyń júzege asyp jatqanyn aıtqan edik.
