SQO-da aýylǵa barǵan dárigerlerdiń kótermeaqysyn ₸5 mln deıin kóterý usynyldy

PETROPAVL. QazAqparat – Soltústik Qazaqstan oblysynda 183 dárigerdiń orny bos tur. Kadr jetispeýshiligi máselesin sheshý úshin densaýlyq saqtaý basqarmasy birrettik kótermeaqyny 5 mln teńgege deıin arttyrýdy usyndy, dep habarlaıdy QazAqparat tilshisi.

Petropavlda oblystyq qoǵamdyq keńestiń kezekti otyrysy ótti. Qozǵalǵan máseleniń biri – medıtsınalyq kadrlardyń jetispeýshiligi.

SQO densaýlyq saqtaý basqarmasy basshysynyń orynbasary Nurbolat Imanjanovtyń aıtýynsha, qazirgi ýaqytta óńirde 183 dáriger jetispese, sonyń 46-sy aýylǵa kerek.

«Akýsher-gınekologtar, anestezıolog-reanımatologtar, rentgenologtar, hırýrgtar, balalar mamandary, onkologtar, kardıologtar qajet. Tapshylyqtyń týýyna negizgi sebepterdi ataıtyn bolsam - mamandardyń óńirden tys jerge qonys aýdarýy, zeınetke shyǵý, jekemenshik emdeý mekemelerine aýysý», - deıdi Nurbolat Imanjanov.

Óńirge kadrdy tartý maqsatynda birqatar jumys atqaryldy.

«Qazirgi ýaqytta dárigerlerge «Dıplommen aýylǵa» baǵdarlamasy boıynsha kredıt beriledi, kásiporyndar esebinen 1-3 mln teńgege deıin qosymsha kótermeaqy bólinedi. Kommýnaldyq shyǵystar, jalaqyǵa qosymsha tólemder, rezıdentýrada oqý aqysy, uıaly baılanys aqysy jáne t.b. óteledi. Máslıhattyń 2021 jylǵy 21 mamyrdaǵy sheshimimen aýyldyq eldi mekenderge jumys isteý úshin kelgen mamandarǵa 2,5 mln teńge mólsherinde áleýmettik qoldaý bar. Qalaǵa jumys isteýge kelgender 1,5 mln teńge alady», - deıdi basqarma basshysynyń orynbasary.

Byltyr oblysqa 280 dáriger keldi, olardyń 167-sine jalpy somasy 314 mln teńge kóterme járdemaqy berildi.

«Búgingi tańda respýblıkanyń basqa óńirleri de kóterme járdemaqy arqyly mamandardy tartýdy qolǵa aldy. Kórshi oblystarda onyń mólsheri 5 mln teńgege deıin ulǵaıtyldy. Osyǵan baılanysty bilikti dárigerlerdi óńirge tartý úshin áleýmettik qoldaýdyń mólsherin qajettilikke qaraı ulǵaıtý jaǵyna qaraı qaıta qaraý qajet dep sanaımyz. Jalpy praktıka dárigerlerine 1 mln teńge qalaǵa kelse, aýylǵa barǵandarǵa 1,5 mln teńge, beıindi mamandarǵa 3,5 mln teńge qala úshin, aýyldy tańdaǵan dárigerlerge 5 mln teńgege jetkizý qajet», - deıdi Nurbolat Imanjanov.