SQO-da aýyldyq ýchaskelik polıtsııa ınspektoryna jumys keńsesi bar qyzmettik úı salynady
PETROPAVL. QazAqparat – Soltústik Qazaqstan oblysynda 2 myńnan astam adamǵa qyzmet kórsetetin aýyldyq ýchaskelik polıtsııa ınspektoryna jumys keńsesi bar baspana salynatyn boldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, ýchaskelik polıtsııa ınspektory Oljas Shaıahmetov Mamlıýt aýdanynda 2 myńnan astam halqy bar alty eldi mekenge qyzmet kórsetedi. № 10-ynshy ákimshilik ýchaskede ótken jyldyń sońynan bastap jumys isteıdi. Jas mamanǵa jaqynda polıtsııa pýnktimen biriktirilgen qyzmettik úı turǵyzylmaq. Novomıhaılovka ortalyǵynan ýchaske tańdalyp, úıdiń jospary ázirlendi. Jalpy aýmaǵy 100 sharshy metr bolatyn qyzmettik keńsesi bar zamanaýı úıdi salý jáne paıdalanýǵa tapsyrý maýsym aıyna josparlanǵan. Jergilikti aýylsharýashylyq taýar óndirýshiler baspanany turǵyzýǵa kómektespek.
Oblystyq polıtsııa basshysy Marat Tólebaev Mamlıýt aýdanynda bolyp, jańa úıdiń qurylys jobasymen tanysty, sonymen qatar aýdannyń ákimi Vladıslav Lýkınmen birge Qyzylásker aýylynyń turǵyndarymen kezdesti.
Birer kún buryn aýylda №11 ýchaskelik polıtsııa pýnktiniń ǵımaraty jóndelip, paıdalanýǵa berildi. Jańa jıhaz, qajetti tehnıkamen jabdyqtaldy, 20 beıne baqylaý kamerasy qosyldy. Mamlıýt aýdany polıtsııa bóliminiń bastyǵy Serik Áljanovtyń aıtýynsha, qazirgi ýaqytta aýdanda 70-ten astam kamera jumys isteıdi.
SQO PD bastyǵy Marat Tólebaev qylmystar men quqyq buzýshylyqtardyń profılaktıkasyn kúsheıtýge, sondaı-aq sońǵy jyldary quqyqtyq tártipti nyǵaıtýda tártip saqshylaryna kómegin tıgizgen qoǵamdyq keńestiń áleýetin paıdalanýdy jalǵastyrýǵa nusqaý berdi.
Kezdesý sońynda polıtsııa polkovnıgi Marat Tólebaev aýdannyń qoǵamdyq keńesiniń toǵyz ókilin alǵys hatpen marapattady, sondaı-aq azamattardy máselelerimen jeke qabyldady.
