SQO-da aýyldastarynyń ıtin soıyp jegen 3 turǵyn ustaldy
PETROPAVL. QazAqparat – Soltústik Qazaqstan oblysynda ıtti uryp óltirip, keıin soıyp jegen úsh turǵynǵa qatysty qylmystyq is qozǵaldy, dep habarlaıdy «QazAqparat» HAA tilshisi.
SQO Polıtsııa departamenti baspasóz qyzmetiniń málimetinshe, 22 tamyz kúni Bolshaıa Malyshka eldi mekeniniń turǵyny polıtsııaǵa aryzdandy. Aıtýynsha, úsh aýyldasy onyń ıtin jep qoıǵan. Ol úsheýdiń bireýine 6 myń teńge qaryz bolǵan. Sonyń óteýi retinde ıtin bergen. Alaıda aýyldastary ol ıtti úı kúzetý úshin emes, jeý úshin alǵan eken.
Úsh er adam ıtti Esil ózeniniń jaǵasynda uryp óltirip, soıyp, otqa qaqtap jegen. Ittiń qyńsyly men ony uryp jatqanyn jaqyn mańda balyq aýlap otyrǵan 12 men 16 jastaǵy eki jasóspirim estıdi. Keıin úıine ketip bara jatqan balalardyń biri úsh aýyldasynyń sary ıtti aǵashqa asyp qoıyp, múshelep jatqanyn kórgen.
Aýdandyq polıtsııa bóliminiń qyzmetkerleri 1987 jyly týǵan kúdiktini ustady. Onyń qasynda bolǵan 1986 jáne 1982 jyly týǵan eki syıbaılasynan jaýap alyndy. Atalǵan fakti Sotqa deıingi tergep-tekserýdiń biryńǵaı tizilimine «Janýarlarǵa qatygezdik jasaý» baby boıynsha tirkeldi. Kúdiktige qatysty kelýge mindettelý túrinde bultartpaý sharasy taǵaıyndaldy.
«Oqıǵaǵa qatysy barlardyń biri ıttiń etin jeýden bas tartqan. Alaıda úsheýi de óz áreketterin oǵashtyq baıqamaıdy. Sot olardyń pikirin ózgertedi degen senimdemiz. Janýarlarǵa qatygezdik kórsetkenderge zań boıynsha 120 AEK mólsherinde aıyppul nemese sol mólsherde túzeý jumystaryna, ne 120 saǵatqa deıingi merzimge qoǵamdyq jumystarǵa tartý, ne bolmasa 30 táýlikke deıingi merzimge qamaqqa alý jazasy qarastyrylǵan», - dedi Qyzyljar aýdany PB bastyǵy Álıhan Baıqadamov.
