SQO-da aýyldardan 100 myń tekshe metr qar shyǵaryldy
PETROPAVL. QazAqparat – Soltústik Qazaqstan oblysynda «Kóktem 2021» respýblıkalyq komandalyq-shtabtyq jattyǵýy barysynda kóktemgi sý tasqynynyń aldyn alýǵa baǵyttalǵan birqatar is-sharalar atqaryldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, «Kóktem 2021» komandalyq jattyǵýy praktıkalyq is-sharalardy ótkizýge barynsha baǵdarlanǵan. Eki táýlik ishinde kóktemgi sý tasqyny qaýpi bar jerlerde qajetti aldyn alý jumystary atqaryldy.
Qutqarýshylar men órt sóndirýshiler, jergilikti atqarýshy organdar, azamattyq qorǵaý qyzmetteri adamdardy shartty túrde sý basqan turǵyn úılerden evakýatsııalaý jáne olardy jylytý, aýyl sharýashylyǵy janýarlaryn aıdap shyǵaryp, arnaıy oryndarǵa ornalastyrý, sý tasqyny saldarynan zardap shekken elektr jelilerindegi avarııany joıý boıynsha operatsııalardy pysyqtady.
Sý tasqynyna qarsy is-sharalarǵa erekshe nazar aýdaryldy. Nátıjesinde eki táýliktiń ishinde sý basý qaýpi joǵary eldimekenderden 100 myń tekshe metrden astam qar shyǵaryldy, halyqtyń áleýmettik osal toby - 93 otbasyna úı mańyndaǵy ýchaskeleri qardan tazartyldy. 48 aryq, 23 kanal, 45 sý ótkizý qurylysy daıyndaldy. Qoldanystaǵy bógetterdiń 700 metrine jóndeý júrgizildi, 1,5 km nyǵaıtyldy.
Buǵan deıin SQO-da 79 eldi mekendi kóktemde sý basý qaýpi bar ekenin aıtqan edik.
