SQO-da aýyl turǵynynan asa iri mólsherde marıhýana tárkilendi

PETROPAVL. QazAqparat – Soltústik Qazaqstan oblysynda Mamlıýt aýdanynyń turǵynan 3,5 kg marıhýana tárkilendi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, óńirde «Tranzıt» jedel-profılaktıkalyq is-sharasy ótti.

Operatsııa aıasynda tártip saqshylary Mamlıýt aýdanyndaǵy aýyldardyń biriniń 35 jastaǵy turǵynynan ósimdik tektes zat salynǵan 7 paket tapqan.

Saraptama onyń jalpy salmaǵy 3,5 kg astam keptirilgen marıhýana ekenin kórsetti. Bul – asa iri mólsherge jatady.

Ustalǵan er adamnyń aıtýynsha, jazda onyń qaraýsyz qalǵan baqshasynda jabaıy qarasora shyqqan.

Ýchaskelik polıtsııa ınspektory ósimdikti kórip, ony joıý qajettigi týraly uıǵarym shyǵarǵan.

Kóp uzamaı aýyl turǵyny ýchaskelik ınspektorǵa shabylǵan qarasorany kórsetken. Alaıda, turǵyn ony jınap keptirip, keıin ony ózi paıdalaný úshin úıinde saqtaǵan.

Atalǵan fakti «Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» baby boıynsha Sotqa deıingi tergep-tekserýdiń biryńǵaı tizilimine engizildi.

«Oblysta ótkizilgen «Tranzıt» jedel-profılaktıkalyq is-sharasy barysynda 23 quqyq buzýshylyq anyqtaldy. Onyń bireýi kontrabanda, ekeýi asa iri mólsherde esirtki zattaryn saqtaýǵa qatysty. 4 kg astam esirtki men psıhotroptyq zattar, onyń ishinde 500 gr sıntetıkalyq esirtki alyndy», - deıdi SQO PD Esirtki qylmysyna qarsy is-qımyl basqarmasynyń bastyǵy Jandos Basybaev.