SQO-da aýyl turǵynynan 625 lıtr spırt tárkilendi
PETROPAVL. QazAqparat – Soltústik Qazaqstan oblysynda zańsyz saýdamen aınalysqan aýyl turǵynynan polıtseıler 625 lıtr spırtti tárkiledi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Aıyrtaý aýdany Saýmalkól aýylynyń 41 jastaǵy turǵyny qoldan jasalǵan araq saýdasymen aınalysqan. Esh jerde jumys istemeıtin turǵynnyń garajyn tekserý kezinde tártip saqshylary kólemi bes lıtrlik 125 ydys tapty. Olardyń ishinde spırtke uqsas suıyq bolǵan. Ónim tolyq tárkilenip, saraptamaǵa jiberildi. Zańsyz kásipkerlikpen aınalysqan er adamǵa ákimshilik hattama toltyryldy.
Mamandardyń aıtýynsha, bul derek óńirde 9-12 aqpan aralyǵynda ótip jatqan «Turmys» jedel-profılaktıkalyq is-sharasy aıasynda anyqtaldy. Polıtseıler profılaktıkalyq esepte turǵandardy tekserip, quqyq buzýǵa beıimdi adamdardy anyqtaıdy. Sonyń ishinde spırttik ishimdikti zańsyz satatyndar basty nazarǵa alynady. Óıtkeni otbasyndaǵy janjal kóp jaǵdaıda alkogoldi ishýden shyǵady eken.
«Arnaıy qujaty joq alkogoldik ónim densaýlyqqa qaýipti. Al spırt ishimdigin jasyryn satý, sonyń ishinde saǵat 23.00-den keıin saýdalaý – mas kúıde jasalatyn qylmystarǵa ákelýi múmkin», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.
Operatsııanyń 3 kúninde SQO polıtseıleri araq-sharapty zańsyz satýǵa qatysty 14 derekti anyqtady. Maskúnem, janjalqoı retinde esepte turǵan 3 myń otbasy tekserildi. Turmystyq zorlyq-zombylyqtyń 38 deregi, sonyń jeteýi polıtseılerdiń úı-úıdi aralaýy barysynda anyqtaldy. Jalpy 530 quqyqbuzýshylyq tirkelgen.
