SQO-da aýyl turǵynynan 5 myltyq tabyldy
PETROPAVL. QazAqparat – Soltústik Qazaqstan oblysynda «Qarý» jedel-profılaktıkalyq is-sharasy aıasynda aýyl turǵynynan polıtseıler 5 myltyqty tapty, onyń ekeýi ǵana tirkelgen bolyp shyqty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Qyzyljar aýdanynda mal sharýashylyǵymen aınalysatyn 40 jastaǵy aýyl turǵynyn tekserý kezinde onyń «IJ» markaly tirkelgen eki myltyqtyń bireýin seıfke salmaı saqtaǵany anyqtaldy.
Odan ári muqııat tekserý barysynda polıtseıler tirkelmegen qarýlardy: eki tegis uńǵyly ańshy myltyǵyn, sondaı-aq oıyq uńǵyly «IJ-56 Belka» myltyǵyn tapty. Atalǵan fakti QR Qylmystyq kodeksiniń «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» baby boıynsha Sotqa deıingi tergep-tekserýlerdiń biryńǵaı tizilimine engizildi.
Er adamnyń sózinshe, tirkelmegen qarýlardy ol aýylynyń mańyndaǵy jol jıeginen taýyp alǵan.
Polıtseıler qajetti saraptamalardy taǵaıyndady, onyń nátıjesi boıynsha qarýdy zańsyz saqtaǵany úshin aýyldyq ákimshilik jaýapkershilikke tartylýy múmkin.
«Tirkelmegen oıyq qarýdy saqtaý qylmystyq jaýapkershilikti kózdeıdi. Nátıjesinde tirkelgen qarýdy saqtaýǵa jáne alyp júrýge berilgen ruqsatty 3 jylǵa avtomatty túrde alyp tastaıdy. Osy merzim aıaqtalǵannan keıin ǵana aýyl turǵyny barlyq qajetti protsedýralardan ótip, qarýmen qaýipsiz jumys isteý boıynsha emtıhan tapsyrǵannan keıin ǵana, tirkelgen qarýyn qaıtara alady», - deıdi SQO PD Ákimshilik polıtsııa basqarmasynyń erekshe tapsyrmalar jónindegi aǵa ınspektory Qurman Mýsın.
«Qarý» operatsııasynyń 3 kúni ishinde 3047 qarý ıesi tekserildi. 143 fakti, onyń 116-sy saqtaý erejelerin jáne 27-si qarýdy tirkeý nemese qaıta tirkeý, olardy esepke qoıý tártibin buzýǵa qatysty anyqtaldy. Zańsyz saqtalǵan 13 qarý alyndy.
