SQO-da aýyl turǵyny jedel járdem kóligin aıdap áketpek boldy
PETROPAVL. QazAqparat – Soltústik Qazaqstan oblysynda aýyl turǵyny mas kúıde jedel járdem qyzmetiniń kóligin aıdap áketpek boldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqıǵa Esil aýdanynda bolǵan. 37 jastaǵy aýyl turǵyny mas kúıde ortalyq aýdandyq aýrýhana aýlasynda turǵan jedel járdem kóligin aıdap áketpek bolǵan. Alaıda aýladaǵy «VAZ 2121» qyzmettik avtokóligine soǵylyp, uzap kete almaǵan. Budan keıin er adam aýrýhananyń qyzmetkeri – júrgizýshini soqqyǵa jyqqan. Buzaqyny shaqyrtý boıynsha kelip jetken ýchaskelik polıtsııa ınspektory ustady.
Esil aýdandyq polıtsııa bóliminiń bastyǵy Erlik Eslámbekovtiń aıtýynsha, atalǵan fakti Sotqa deıingi tergep-tekserýdiń biryńǵaı tizilimine «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» baby boıynsha engizildi. Budan bólek, aýyl turǵynyna kólikti mas kúıde júrgizbek bolǵany úshin hattama toltyryldy. Sotqa deıingi tergeý quqyqbuzýshy 20 táýlik ákimshilik qamaý jazasyn ótegennen keıin jalǵasatyn bolady. Júrgizýshini soqqyǵa jyǵý faktisi boıynsha protsessýaldyq sheshim sot-medıtsınalyq saraptamadan keıin qabyldanbaq.
Jalpy jyl basynan SQO-da bireýdiń kóligin aıdap ketýge qatysty 67 derek tirkeldi.
