SQO-da aýyl turǵyny úıinde jarylǵysh zattar jasap kelgen
PETROPAVL. QazAqparat – Soltústik Qazaqstan oblysynda 63 jastaǵy aýyl turǵynynan polıtseıler qoldan jasalǵan jarylǵysh zattardy tapty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Shal aqyn aýdanynyń ortalyǵy Sergeevkaǵa Tımırıazev aýdanynyń 63 jastaǵy turǵyny kelgen. Ol bos qol kelmeı, ózimen qarý-jaraq ala kelgen.
Polıtseıler er adamnan pyshaq pen jarylǵyshqa uqsas tutatqyshy bar metall tútikterdi tárkiledi.
Aýyl turǵynynyń úıin tekserý kezinde jarylǵysh qurylǵyny jasaýda qoldanylatyn zattar, patrondar men qoldan jasalǵan eki granata tabyldy.
Saraptama qoldan jasalǵan granata túrindegi bul jarylǵysh qurylǵylardyń jarylý jáne kúıdirý áseri bar jaýyngerlik qarý-jaraqtarǵa jatatynyn rastady.
«Atalǵan fakti QR Qylmystyq kodeksiniń «Qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý» baby boıynsha sotqa deıingi tergep-tekserýlerdiń biryńǵaı tizilimine engizildi. Qajetti saraptamalar taǵaıyndaldy, tergeý amaldary júrgizilip jatyr», - deıdi Shal aqyn aýdandyq polıtsııa bóliminiń basshysy Rýslan Muhambetjanov.
Shal aqyn aýdanynyń soty kúdiktini qamaýǵa alýǵa sanktsııa berdi.
