SQO-da aýyl turǵyny taǵamǵa paıdalanatyn ósimdiktiń 17 túrin ósirip otyr
PETROPAVL. QazAqparat – Soltústik Qazaqstan oblysynda aýyl turǵyny «Bastaý-Bıznes» memlekettik baǵdarlamasy aıasynda kókónis ósiretin shaǵyn ferma ashty, dep habarlaıdy QazAqparat tilshisi.
SQO Kásipkerler palatasy baspasóz qyzmetiniń málimetinshe, Mamlıýt aýdanynyń turǵyny Olesıa Selına pııaz, askók, aqjelken sııaqty taǵamǵa jıi qoldanatyn ósimdikterdi ósirýge bel býady. Mundaı ónimderdiń densaýlyqqa paıdasy joǵary bolǵandyqtan, naryqta jyl on eki aı suranys joǵary. Kózdegenin júzege asyrýǵa oǵan «Bastaý-Bıznes» baǵdarlamasy kómektesti.
Kýrstan ótken kelinshektiń bıznes ıdeıasy qoldaý tapty. Osylaısha 3 mln teńgege deıin grant utyp aldy. Ol aqshaǵa Kırov qalasynan arnaıy gıdroponıka qondyrǵysy satyp alynyp, jetkizildi. Al jaryqtandyrýdy jáne ósimdikterdi avtomatty túrde sýaratyn júıeni óz qarajatyna ornatty.
«Ǵımarattyń ishinde tıisti mıkroklımatty qalyptastyrý ońaı bolmady. Ósimdik ósýi úshin ylǵaldy aýa, birqalypty temperatýra, jeldetý júıesi bolýy kerek. Sonda ǵana gıdroponıka qaǵıdaty jumys isteıdi. ıAǵnı ósimdikter topyraqsyz ósip, tamyry qajetti qunarly zatty eritindiden alady.
ıAǵnı gıdropondy ferma jumys isteýi úshin tehnologııany meńgerip, ony engizý qajet boldy», - deıdi Olesıa Selına.
Qazir kásipker áıel taǵamǵa paıdalanatyn ósimdiktiń 17 túrin ósiredi.
Olardyń ishinde daıkon, redıs, brokkolı men rýkkola bar. Al shaǵyn fermanyń jalpy aýmaǵy bar bolǵany 25 sharshy metr.
«Búginde Olesıanyń ónimine tapsyrys jetkilikti. Petropavldaǵy 12 dámhana, meıramhanalarmen baılanys ornatqan. Odan artylǵanyn saýda úılerine ótkizedi. Qazirgi ýaqytta pandemııaǵa baılanysty qoǵamdyq tamaqtaný oryndarynyń jumysy azdap turalap qaldy, sol sebepti saýdalanatyn ónim kólemi de azaıdy. Biraq munyń bári ýaqytsha, mundaı fermalardyń bolashaǵy bar», - deıdi SQO kásipkerler palatasynyń dırektory.
