SQO-da aýyl turǵyny sholaq myltyq pen oq-dárini zańsyz saqtap kelgen
PETROPAVL. QazAqparat – Soltústik Qazaqstan oblysynda qarýdy zańsyz saqtap kelgen aýyl turǵyny jaýapkershilikke tartylmaq. Ol eń keminde 5 myń AEK mólsherinde aıyppul tóleıdi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Aqjar aýdany polıtsııa bólimine aýyldardyń biriniń 44 jastaǵy turǵyny zańsyz qarý saqtaıdy degen aqpar kelip túsken. Polıtseıler er adammen sóıleskenimen, bastapqyda ol kinásin moıyndamaǵan. Krımınaldyq polıtsııa qyzmetkerleri ýchaskelik ınspektormen birge aýyl turǵynynyń úıin tintti. Nátıjesinde onyń úıinen shamamen «IJ» markaly dara uńǵyly ańshy qarýynan jasalǵan sholaq myltyq, 12 kalıbrli gılza men kalıbri 9 mm Makarov tapanshasynyń 4 patrony tárkilendi.
Qazirgi ýaqytta tárkilengen qarý úlgisi men oq-dári saraptamaǵa jiberildi. Atalǵan fakti QR Qylmystyq kodeksiniń 287-baby «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» boıynsha Sotqa deıingi tergep-tekserýlerdiń biryńǵaı tizilimine engizildi.
«Jyl basynan oblysta zańsyz aınalymnan 75 qarý alyndy. Qarýdy zańsyz saqtaǵany úshin ákimshilik pen qylmystyq jaýaptylyq barlyǵyn eske salamyz. Adamnyń is-áreketinde ózge de qylmys quramy bolmasa qarýdy polıtsııaǵa erikti túrde tapsyrǵandar jazaǵa tartylmaıdy. Aıta ketetin bolsaq, bıylǵy jyly soltústikqazaqstandyqtar erikti túrde 26 qardy tapsyrdy», - deıdi SQO PD Ákimshilik polıtsııa basqarmasynyń erekshe tapsyrmalar jónindegi aǵa ınspektory Qurman Mýsın.
Polıtseılerdiń aıtýynsha, qarýdy zańsyz saqtaǵandarǵa eń keminde 5 myń AEK mólsherinde aıyppul salynady, al eń úlken jaza 5 jylǵa deıingi merzimge bas bostandyǵynan aıyrý.
