SQO-da aýyl turǵyny myltyqty balalardyń qoly jetetin jerde saqtaǵan
PETROPAVL. QazAqparat – Soltústik Qazaqstan oblysynda «Qarý» jedel-aldyn alý sharasy ótip, tártip saqshylary 3 kúnniń ishinde 1300-den astam qarý ıelerin tekserdi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń habarlaýynsha, sharanyń maqsaty - sýyq qarýdy qoldaný arqyly jasalatyn qylmystardyń aldyn alý. Sondaı-aq qarý-jaraqtyń tıisti deńgeıde saqtalýyn qadaǵalaý.
«Qarý men oq-dáriler urlanyp, qylmys jasaý maqsatynda qoldanylmaýy úshin olardy saqtaý erejelerin qatań ustaný kerek. ıAǵnı, sýyq qarý arnaıy seıfte saqtalýy tıis. Jedel-profılaktıkalyq shara barysynda tek osy erejeni buzý boıynsha ǵana 60 ákimshilik hattama toltyryldy», - deıdi SQO PD ákimshilik polıtsııa basqarmasynyń bastyǵy Jasulan Ospanov.
Jalpy, operatsııa bastalǵaly tártip saqshylary 90 kemshilikti anyqtaǵan. Onyń 26-sy qarýdy qaıta tirkeý merzimin buzýǵa qatysty.
«Ǵabıt Músirepov aýdanynyń 40 jastaǵy turǵynynan esh jerde tirkelmegen 12 kalıbrli «IJ – 58» myltyǵy tabyldy. Sózine qaraǵanda, er adam ony 2015 jyly tanymaıtyn bir ańshydan satyp alypty. Sýyq qarý 4 jyl boıy úıdiń kire berisinde turǵan dıvannyń astynda, balalardyń qoly ońaı jetetin jerde saqtalyp kelgen. Jedel-profılaktıkalyq shara aıasynda zańsyz saqtalǵan 4 qarý tárkilendi», - deıdi Jasulan Ospanov.
Jyl basynan oblys polıtseıleri sýyq qarýǵa qatysty 661 zańbuzýshylyqty anyqtady. 411-i - qarýdy saqtaýǵa qatysty bolsa, 200-den astamy - tirkeý jáne qaıta tirkeý erejelerin buzǵandar. Sondaı-aq qarýdy zańsyz saqtaý jáne satyp alýdyń 39 faktisi anyqtaldy.
