SQO-da aýyl turǵyny asa iri kólemdegi esirtkimen ustaldy

PETROPAVL. QazAqparat – Soltústik Qazaqstan oblysynda Qyzyljar aýdanynyń turǵynynan 5 kg jýyq marıhýana tabylyp, tárkilendi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Qyzyljar aýdanynyń 40 jastaǵy turǵyny Petropavl qalasyna kelgen. Polıtseıler onyń «Subaru Legacy» avtokóliginiń júksalǵyshynan ózine tán erekshe ıisi bar ósimdiktektes zat salynǵan, skotchpen oralǵan polımerli paketti tapty. Saraptama qorytyndysyna sáıkes, ol 4 kg 960 gr keptirilgen marıhýana ekeni anyqtaldy. Bul – asa iri kólemge jatady.

Atalǵan fakti QR Qylmystyq kodeksiniń «Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» baby boıynsha Sotqa deıingi tergep-tekserýdiń biryńǵaı tizilimine engizildi.

«Qazirgi ýaqytta onyń esirtki satýǵa qatysy bar-joǵy tekserilip jatyr. Ustalǵan adamnyń aýdan ortalyǵy Beskóldegi úıin teksergen kezde ósimdiktektes zat oralǵan eki polımerli paket pen tarazy tabyldy. Alynǵan zattar sot-hımııalyq saraptamaǵa jiberildi. Kúdiktige qatysty qamaýǵa alý túrindegi bultartpaý sharasy qabyldandy», - deıdi SQO PD Esirtki qylmysyna qarsy is-qımyl basqarmasynyń bastyǵy Jandos Basybaev.

Kúdikti asa iri kólemde esirtkini ózi úshin ustasa 3 jyldan 7 jylǵa deıingi merzimge bas bostandyǵynan aıyrylady, satý maqsatynda saqtaǵan bolsa, 20 jylǵa deıin sottalady.

Jyl basynan beri SQO-da polıtseıler esirtkini zańsyz satýmen baılanysty 10 kúdiktige qatysty 13 qylmystyq isti sotqa jiberdi. 16 adam ýaqytsha ustaý ızolıatoryna qamaldy.