SQO-da aýyl turǵyny alaıaqtarǵa aldanyp, 2,6 mln teńgesinen aıyryldy
PETROPAVL. QazAqparat – Soltústik Qazaqstan oblysynda aýyl turǵyny alaıaqtardyń arbaýyna túsip, depozıtindegi 2 mln 600 myń teńgesinen aıyryldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 39 jastaǵy áıel - Taıynsha aýdanynyń turǵyny tegin habarlandyrýlar saıty arqyly jıhazyn satýǵa qoıǵan. Onymen «satyp alýshy» baılanysqa shyǵyp, jıhazdy satyp alǵysy keletinin aıtqan. Ol óziniń shoty Reseı bankinde ekendigin, tólem jasaý úshin JSN men karta nómirin ataýdy suraǵan. Sonymen qatar «júk tıeýshiler» kelýi úshin mekenjaıdy aıtýyn ótingen. Aram oıy joq aýyl turǵyny telefonnyń ar jaǵyndaǵy áıel túbirtek toltyrý úshin qajet degesin sms-habarlamamen kelgen kodty da aıtqan. Birazdan soń jıhaz úshin aqshanyń túsken-túspegenin bilý maqsatynda bankke habarlasqan. Bankten onyń depozıtinen úsh kezeńmen 2 mıllıon 600 myń teńgeden astam barlyq jıǵan qarajaty alynǵanyn habarlaǵan.
Óziniń alaıaqtarǵa jem bolǵanyn bilgen taıynshalyq polıtseılerge aryzdandy. Atalǵan fakti «Alaıaqtyq» baby boıynsha Sotqa deıingi tergep-tekserýlerdiń biryńǵaı tizilimine engizildi. Jedel-izdestirý is-sharalary qolǵa alyndy.
Al Petropavldyń 54 jastaǵy turǵyny 700 myńnan astam teńgesinen aıyryldy. Áıelge alaıaqtar banktiń qaýipsizdik qyzmetinenbiz dep qońyraý shalyp, onyń shotynan bireýdiń barlyq aqshasyn aýdaryp jatqanyn aıtyp sastyrǵan. Qarajatty saqtap qalý úshin tez arada ony basqa shotqa aýystyrýǵa keńes bergen. Qala turǵyny alaıaqtarǵa kartasynyń nómiri men sms-habarlama kodty aıtqan, saldarynan depozıtinde jatqan 700 myń teńgesinen aıyryldy.
«Qylmyskerler túrli aıla-tásilderdi qoldanady, olardyń maqsaty jábirlenýshiniń jeke jáne qarjylyq derekterine qol jetkizý. Bank qyzmetkerleri osyndaı máselemen qońyraý soqpaıtyndyǵyn adamdardyń esine salamyz. Klıenttiń ózinen basqa eshkim shotyndaǵy qarajatty basqara almaıdy. Turǵyndarǵa eshkimge, eshqandaı jaǵdaıda bank kartalarynyń nómiri men cvv-kodyn, sonymen qatar kartalar men jeke qujattardyń fotosýretin jibermeýdi, sms-habarlamadaǵy kodty aıtpaýdy suraımyz», -deıdi SQO PD Krımınaldyq polıtsııa basqarmasynyń asa mańyzdy ister jónindegi polıtsııa maıory Vıtalıı Podchernın.
Sońǵy tórt kúnde SQO-da 7 ınternet-alaıaqtyq tirkeldi.
