SQO-da aýyl turǵyndaryna shaǵyn nesıe berýge 2,6 mlrd teńge bólindi

NUR-SULTAN. QazAqparat – Bıyl Soltústik Qazaqstan oblysynda aýyl turǵyndaryna shaǵyn nesıe berýge 2,6 mlrd teńge bólindi. Bul týraly Úkimet basshysynyń orynbasary Eraly Toǵjanovtyń óńirge sapary aıasynda ótken keńeste aıtyldy, dep habarlaıdy QazAqparat primeminister.kz saıtyna silteme jasap.

E.Toǵjanov «2025 jylǵa deıin halyqtyń tabysyn arttyrý baǵdarlamasynyń» keshendi josparyn júzege asyrý boıynsha keńes ótkizdi. Oǵan ortalyq memlekettik organdardyń, qoǵamdyq uıymdardyń, «Atameken» UKP ókilderi jáne oblys basshylary qatysty.

SQO-da bıyl aýyl turǵyndaryna shaǵyn nesıe berýge 2,6 mlrd teńge bólindi. Aýylda kooperatsııa damyp keledi, búginde 137 aýyl sharýashylyǵy kooperatıvi tirkelgen.

«SQO-da jaqsy nátıjelerge qol jetkizildi. Aýyl sharýashylyǵy qurylymdarynyń turǵyndar aldynda jaýapkershiligi bar. Bul rette aýyl okrýgteriniń ákimdikteri men JShS arasyndaǵy ekijaqty memorandýmdar úlken ról atqardy», - dep atap ótti vıtse-premer.

Elimizde ekonomıkanyń barlyq salalarynda jumyspen qamtýǵa járdemdesýge jáne jumysshy jastardy qoldaýǵa kóńil bólinip otyr. Jyl sońyna deıin SQO-da 13 myń jumys orny ashylady. «Birinshi jumys orny», «Jastar praktıkasy», «Urpaqtar kelisimsharty» jáne basqa da jobalar sheńberinde jumysqa ornalastyrý uıymdastyryldy.

Jalpy ınvestıtsııa kólemi 76 mlrd teńgeden asatyn 31 ınvestıtsııalyq jobany iske asyrý júrgizilýde. Bul 1 300-den astam adamdy turaqty jumyspen qamtamasyz etedi.

Sondaı-aq eńbek kiristerindegi teńgerimsizdikti joıý jáne halyqtyń satyp alý qabiletin arttyrý qamtamasyz etiledi. Máselen, Soltústik óńirde mańyzdy taýarlardyń baǵasyn qoldaıtyn turaqtandyrý qory jumys isteıdi.

«Qazirgi ýaqytta oblysta áleýmettik mańyzy bar azyq-túlik ónimderiniń 19 ataýynyń 15-i óndiriledi. Adamdar azyq-túlikpen tolyq qamtamasyz etilgen. Áleýmettik mańyzy bar azyq-túlik ónimderine 15% kóleminde saýda ústemesin saqtaý máselesi kúndelikti baqylaýda», - dedi SQO ákiminiń orynbasary Satjan Ablalıev.

Búgingi tańda SQO-da «Halyq tabysyn arttyrýdyń 2025 jylǵa deıingi keshendi baǵdarlamasy» iske asyrylyp jatyr. Eń tómengi kúnkóris deńgeıinen az tabys alatyn halyqtyń úlesi 6-dan 5,5% deıin tómendedi. 2022 jyldyń birinshi jartyjyldyǵynda óńirde ortasha aılyq jalaqy ótken jyldyń sáıkes kezeńimen salystyrǵanda 22% ósti.

Sondaı-aq keńeste oblys ókilderi halyqtyń tabysyn arttyrý boıynsha júrgizilip jatqan jumystar týraly baıandady.

Foto: primeminister.kz