SQO-da aýyl turǵyndary 2,5 paıyzben jeńildetilgen nesıe ala alady
«Aýyl amanaty» jobasynyń mobıldi toby turǵyndarmen kezdesýdi Aıyrtaý jáne Taıynsha aýdandarynan bastady. Jańa jobanyń maqsaty men mindeti aýyl jurtyn habardar etti. Eń bastysy – qala men aýyl turǵyndary arasyndaǵy tabys alshaqtyǵyn qysqartý.
«Elimizdiń ekonomıkalyq ál-aýqatynyń negizi – aýyldy damytý. Aýyl bárin asyrap otyr. Sondyqtan bul joba aýyl halqyna arnalǵan. Turǵyndar jyldyq 2,5% jeńildikpen nesıe alýǵa úmitker bola alady. Sondaı-aq olarǵa kooperatıvter qurýǵa jáne tehnıkany lızıngke alýǵa kómektesemiz. Mysaly, baqsha egý arqyly otbasyny ǵana asyrap qoımaı, artyǵyn satyp jaqsy tabys tabýǵa bolatynyn túsindirgimiz keledi», - dedi bıznes-trener Gúlsim Abdýllına.
Mobıldi top aqparattyq-túsindirý kezdesýleri barysynda aýyl turǵyndaryna jumyspen qamtý jáne tabysty arttyrý tásilderi týraly aıtyp bermek.
Aıyrtaý aýdanyndaǵy Imantaý aýylynyń turǵyny Balqııa Turlybekova 2,5 % jeńildikpen beriletin nesıe isti damytýǵa jaqsy múmkindik dep esepteıdi. Áıeldiń aıtýynsha, mundaı qaryzdy tóleý ońaı, óıtkeni kommertsııalyq bankterde artyq tólem shamamen 50% quraıdy.
«Kúıeýim ekeýmiz qarjylaı qoldaý qorynan tehnıka satyp alýǵa nesıe aldyq. Biraq jyldyq mólsherlemesi 6 % boldy. Biz ony tólep, qutyldyq. Al 2,5 % paıyzdyq kórsetkish ınflıatsııa jaǵdaıynda tegin qaryz alýmen teń. Bul joba keıbirine kásipkerlik aınalysýǵa serpin beredi. Eger kooperatıv quratyn bolsa, onda birlesip kásippen aınalysa alady. Onyń ústine ónimdi ótkizýge kómektespek», - deıdi aýyl turǵyny.
Taıynsha aýdany Chkalov eldi mekeniniń turǵyndaryn kooperatıvter qurý máselesi erekshe qyzyqtyrdy. Aýyl turǵyndaryna kooperatıvterdiń arqasynda jem-shóp pen tyńaıtqyshtardy arzan baǵamen satyp alý múmkindigi barlyǵy aıtyldy. Sonymen qatar, kooperatıvter birlesip tehnıkany satyp ala alady. Tabys kooperatıvtiń barlyq músheleri arasynda teń bólinedi.
«AMANAT» partııasy SQO fılıaly baspasóz qyzmetiniń málimetinshe, partııa QR Úkimetimen birlesip, halyqtyń tabysyn 2025 jylǵa deıin arttyrý baǵdarlamasyn iske asyrý aıasynda ázirledi. Mobıldi top 19 tamyzǵa deıin SQO-nyń 22 aýylyn aralap shyqpaq.
