SQO-da aýyl sharýashylyǵyndaǵy pılottyq joba aıasynda jańa 40 shaqty kásiporyn paıda bolady

PETROPAVL. QazAqparat – Soltústik Qazaqstan oblysynda aýyl sharýashylyǵy salasynda qolǵa alynǵan ilkimdi joba aıasynda respýblıkalyq qazynadan eki jylda 35 mlrd teńge bólindi. Mal sharýashylyǵyn damytýǵa baǵyttalǵan 40 shaqty jańa nysannyń qurylysy qolǵa alyndy, onyń basym kópshiligi – sút fermasy, dep habarlaıdy QazAqparat tilshisi.

SQO ákimdiginde aýyl sharýashylyǵyndaǵy ınvestıtsııalyq jobalarǵa arnalǵan jıyn ótip, onda SQO ákiminiń birinshi orynbasary Marat Tasmaǵanbetov baıandama jasap, osy baǵytta atqarylyp jatqan jumystarǵa toqtaldy.

«SQO-nyń aýyl sharýashylyǵynyń áleýeti joǵary. Tórt jyl buryn óńir mal sharýashylyǵyn damytýǵa baǵyt aldy. Ónim óndirýden 2020 jyly 2 oryn, byltyr 3 oryn aldyq, bıyl 9 aıdyń qorytyndysy boıynsha respýblıkada 1 orynda kelemiz.

Investıtsııa tartýdan da el boıynsha úzdikter qataryndamyz. Bıyl salaǵa 160 mlrd teńge tartý josparda bar. Osylaısha sońǵy 5 jylda ınvestıtsııa kólemi eki esege artyp otyr», - deıdi Marat Tasmaǵanbetov.

Mal sharýashylyǵyn damytý arqyly ekonomıkalyq jáne áleýmettik jaǵdaıdy jaqsartýǵa bolady, osylaısha, ımportqa táýeldilik tómendeıdi, azyq-túlik qaýipsizdigi qamtamasyz etiledi jáne jańa turaqty jumys oryndary ashylady.

«Biz ónimdiligi joǵaly tsıfrlyq sút fermalaryn kóptep salýǵa basymdyq berdik. Alaıda sharýashylyqtar bul jobalardy júzege asyrýda kóptegen qıyndyqtarǵa tap boldy. Sonyń biri – nesıe alý. Qaǵazbastylyq, kepil múliktiń talap etilýi, saldarynan 2-3 jyldy joǵaltý.

Máseleni sheshý úshin «Soltústik» áleýmettik-kásipkerlik korporatsııasy arqyly osy saladaǵy iri jobalarǵa jeńildetilgen nesıe berý úshin pılottyq joba qolǵa alyndy. Ol óz nátıjesin berip jatyr, sondyqtan respýblıkalyq deńgeıge shyǵaryp, óńirdi damytýdyń keshendi josparyna qostyq. Eki jyldyń ishinde respýblıkadan 35 mlrd teńge bólindi», - deıdi SQO ákiminiń birinshi orynbasary.

Jeńildetilgen nesıe tájirıbeli, turaqty tabysy bar sharýashylyqqa 4% 8 jylǵa beriledi. Al kepil retinde alatyn maly men qondyrǵylar qoıylady.

Byltyr SQO-da osylaısha aýyl sharýashylyǵynyń 6 baǵyty boıynsha 17 joba qarjylandyryldy, bıyl 7 baǵyt boıynsha 20 jobany iske asyrýǵa nesıe berildi. Onyń ishinde 17 sút fermasy da bar, 8-i jyl sońyna deıin paıdalanýǵa berilmek. Kásiporyndar bolashaǵy bar eldi mekenderdiń mańyna salynyp jatyr.

«Bir fermanyń salynýymen orta eseppen 50 adam turaqty jumysqa ornalasady. Ferma qurylysymen aýyldyń ınfraqurylymy da damıdy.

Máselen Aqqaıyń aýdanyndaǵy Lenınskoe eldi mekeninde 600 sıyrǵa shaqtalǵan ferma salyndy. 40 adam jumysqa alyndy. Mal sharýashylyǵynan túsken tabystyń esebinen ferma jumysshylaryna 18 baspana turǵyzyldy. Qoǵamdyq monsha jónge keltirilip, dámhana, mal soıatyn oryn ashyldy», - deıdi SQO ákiminiń birinshi orynbasary.

Marat Tasmaǵanbetovtyń aıtýynsha, óńirde mundaı oń mysaldar jetkilikti.