SQO-da aýyl sharýashylyǵy salasynyń 60 jumysshysy marapattaldy
PETROPAVL. QazAqparat - Petropavlda Aýyl sharýashylyǵy jumysshylary kúnine arnalǵan saltanatty shara ótti, dep habarlaıdy «QazAqparat» HAA tilshisi.
SQO ákimi Qumar Aqsaqalov óńirdiń agroónerkásip kesheniniń ókilderin merekemen quttyqtap, aýyl sharýashylyǵy salasynyń Soltústik Qazaqstan oblysynyń ekonomıkasyn damytýdaǵy zor mańyzyn atap kórsetti.
«Soltústik Qazaqstan - topyraǵy asa baı ólke. Aldyn ala málimetterge oraı, bıyl aýylsharýashylyq ónimderiniń kólemi 26 mlrd teńgege jetti, al syrtqy saýda aınalymy 30%-ke artty. Egistik alqaptaryn dıversıfıkatsııalaý/ártaraptandyrý boıynsha kóp jumystar atqaryldy. Maıly daqyldardyń alqaby ulǵaıdy. Dándi-burshaqty daqyldar 2 ese úlken alqapqa egildi. Gektarynan 18,2 tsentner, jalpy 5,6 mln tonna astyq jınadyq», - dedi oblys ákimi.
Qumar Aqsaqalov óńirde eńbek ónimdiliginiń artqanyna toqtaldy. 
«Respýblıkamyzda eńbek ónimdiligi jan basyna shaqqanda 1,7 mln teńgeni, al bizdiń oblysta 2,3 mln teńgeni quraıdy. Menińshe, bul da áli sharyqtaý shegi emes, bul kórsetkishti kem degende 3,5-4 mln teńgege deıin jetkizýge bolady. Oblysta eńbek ónimdiligi 10 mln teńgeden asatyn álemdik deńgeıdegi sharýashylyqtar jetkilikti. Aldaǵy ýaqytta olardyń sanyn odan ári kóbeıtý qajet», - dedi ol.
QR Aýyl sharýashylyǵy mınıstriniń atynan Qumar Aqsaqalov oblystyń eki turǵynyna «Eńbek ardageri» medalin, úsh jumysshyǵa «Aýyl sharýashylyǵy salasynyń úzdigi» tósbelgisin tapsyrdy, on adam qurmet gramotalarymen marapattaldy. Taǵy da qyryqtan astam jumysshyǵa SQO ákiminiń alǵys haty berildi.
«Úzdik kombaınshy», «Úzdik mehanızator», «Úzdik jetekshi», «Úzdik saýynshy», «Úzdik malshy», «Úzdik - jas maman», «Óndiris jáne óńdeý isiniń úzdik tehnology», «Úzdik aýyl» atalymdary boıynsha da jeńimpazdar anyqtaldy. 
Qumar Aqsaqalov bes orman sharýashylyǵy mekemesiniń basshylaryna órt sóndirý mashınalaryn tabystady. 
Shara sońynda aýyl sharýashylyǵy eńbekkerlerine Qazaqstan Respýblıkasyna eńbek sińirgen óner qaıratkeri, «Qurmet» ordeniniń ıegeri, estrada juldyzy Altynaı Jorabaevanyń qatysýymen kontserttik baǵdarlama tartý etildi.
