SQO-da aýyl polıtseılerine ýchaskelik pýnkti bar turǵyn úıler salynbaq
PETROPAVL. QazAqparat – Soltústik Qazaqstan oblysynda aýyldardyń ýchaskelik polıtsııa qyzmetkerlerine turǵyn úıi bar polıtsııa pýnktteri salynady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, QR ІІM qoǵamdyq keńesiniń onlaın-otyrysynda SQO polıtsııa departamentiniń bastyǵy Marat Tólebaevtyń baıandamasy tyńdaldy. Vedomstvo basshysy óńirdegi ishki ister organdaryn jańǵyrtý jónindegi Jol kartasynyń 2019-2021 jyldarǵa arnalǵan is-sharalaryn iske asyrý týraly aqparattandyrdy.
Marat Tólebaev jeke quramnyń kadr áleýetin ońtaılandyrý jumysy týraly, qyzmetkerlerdi áleýmettik qorǵaý jáne olardy turǵyn úımen qamtamasyz etý týraly aıtyp berdi. Petropavlda 41 qyzmetker men olardyń otbasy músheleri turyp jatqan vedomstvolyq jataqhana bar. Bıyl jergilikti atqarýshy organdardyń jáne sharýashylyqtardyń kómegimen Mamlıýt aýdanynyń Novomıhaılovka aýylynda aýyldyq ýchaskelik polıtsııa ınspektory úshin turǵyn úımen qosylǵan polıtsııa pýnktiniń qurylysy júrgizilmek. Bul bastamany oblystyń ózge de aýdan ákimderi de aldaǵy ýaqytta qoldamaq.
Marat Tólebaevtyń sózinshe, servıstik modelge kóshýdiń negizgi prıntsıpteriniń biri - halyqqa jaqyn bolý. SQO polıtsııasynyń barlyq aýmaqtyq bólinisterinde kelýshilerge yńǵaıly bolý úshin azamattarǵa arnalǵan qabyldaý bólmesi ashylǵan. Sondaı-aq, oblys ortalyǵynda zamanaýı modýldik beketter jumys isteıdi. Bıylǵy jyly Jas Órken, Bereke, Bylǵary zaýyty, vokzal mańy yqsham aýdandarynda zamanaýı modýldiń taǵy tórteýi ashylmaq. Bul polıtseılerdiń únemi ýchaskelerinde bolýyna múmkindik beredi.
Memlekettik qyzmet kórsetý, qylmystyq isterdi sapaly tergeý, birizdilik prıntsıpi boıynsha azamattardyń ótinishterin qabyldaý - SQO PD bastyǵy óz baıandamasynda jumystyń barlyq negizgi baǵyttaryn qamtydy. QR ІІM Qoǵamdyq keńes múshelerin tergeý bólinisteriniń jumysyn uıymdastyrý, sondaı-aq soltústikqazaqstandyq polıtseılerdiń RF shekaralas aýmaqtaryndaǵy áriptesterimen ózara is-qımyldy nyǵaıtý máseleleri qyzyqtyrdy. Jalpy SQO PD jumysyn Qoǵamdyq keńes músheleri oń baǵalady.
