SQO-da aýyl qarttary kompıýter men smartfondy meńgerip jatyr
Beskól aýylynda tamyz aıynda ashylǵan kompıýterlik kýrstan osy kúnge deıin bes adam ótip, sertıfıkat alyp shyqqan. Olardyń arasyndaǵy eń jasy úlkeni – 75 jasta. Qarttar kompıýterdi, smartfondy qosýdan bastap, kúndelikti qajetti baǵdarlamalarmen jumys isteýge deıin úırendi.
«Telefonym bar. Biraq ishindegilerimen jumys isteýdi bilmedim. Qazir fotoǵa túsirip, ony basqalarǵa jiberýdi úırendim. Oıyn oınamasaq ta, ınternetti meńgergimiz keledi. Qyzdar aqyryndap úıretip jatyr», - deıdi 62 jastaǵy aýyl turǵyny Teńdik Osıpova.
Qazir kompıýterlik kýrsqa 10 adam kezekpen kelip júr. Olar oqytýshylarynyń aıtqanyn muqııat tyńdap, umytyp qalmas úshin mańyzdylaryn dápterlerine jazyp alady. Oqý baǵdarlamasy eki aptaǵa shaqtalǵan.
«Ata-ájeler aptasyna bir ret kelip, eki saǵat jańa mashyqtardy meńgeredi. Biz olarǵa áleýmettik jelide jáne elektrondy poshtamen jumys isteýdi, qujat ashyp, terýdi, al, smartfonmen fotoǵa túsirýden bastap, túrli baǵdarlamalardy júkteýge úıretemiz. Zeınetkerlerdiń qyzyǵýshylyǵy joǵary. Kýrs 4 saǵatqa ǵana shaqtalsa da, olar sertıfıkat alýǵa asyǵar emes. Sabaq aıaqtalǵanmen, áli kúnge deıin kelip júrgenderi bar», - deıdi kompıýterlik kýrsty uıymdastyrýshylardyń biri - Veronıka Zıýkına.
Beskóldik belsendi jastar «Áleýmettik jobalardyń jármeńkesi» atty shaǵyn granttar baıqaýyna qatysyp, 500 myń teńgeniń grantyn jeńip alǵan eken.
«Jas pen kárige mobıldi tehnologııalar qoljetimdi» atty jobamyz jeńiske jetti. Syılyq retinde berilgen grantqa noýtbýk pen uıaly telefon satyp alyp, osy kýrsty ashtyq. Baıqaýdyń talaby boıynsha biz 2 aı boıy Beskól aýylynyń zeınetkerlerine kompıýterdi jáne smartfondardy meńgerýge tegin úıretemiz», - deıdi Veronıka Zıýkına.
