SQO-da «Aýyl – El besigi» baǵdarlamasy aıasynda bıyl 18 joba júzege asady

PETROPAVL. QazAqparat – Soltústik Qazaqstan oblysynda bıyl toǵyz eldi meken «Aýyl – El besigi» baǵdarlamasynyń sharapatyn kóredi, dep habarlaıdy QazAqparat tilshisi.

SQO-da byltyr memlekettik baǵdarlama 26 myń adamdy qamtıtyn 3 eldi mekende – Saýmalkól, Beskól jáne Talshyqta júzege asyryldy. 19 joba josparlanǵan bolsa, sonyń 17-si iske qosyldy. Qalǵany bıylǵa qaldyryldy.

SQO Іshki saıasat basqarmasynyń málimetinshe, «Aýyl – El besigi» memlekettik baǵdarlamasy boıynsha Saýmalkólde jylý berý júıesiniń qurylysy aıaqtalmady. Sondaı-aq dene shynyqtyrý-saýyqtyrý kesheniniń qurylysy jáne óner mektebin qalpyna keltirý jumystary bıyl jalǵasyp, paıdalanýǵa beriledi.

Al 2020 jylǵa óńirge respýblıkalyq bıýdjetten 1 mlrd 776 mln teńge 1-transhpen berilmek. Bul qarajat tórt eldi mekenniń – Beskól, ıAvlenka, Saýmalkól jáne Asanovonyń kommýnaldyq-ınjenerlik, áleýmettik jaǵdaıyn jáne kóliktik ınfraqurylymyn jaqsartýǵa jumsalady.

Ekinshi transhpen respýblıkalyq qazynadan 2072,6 mln teńge, jergilikti bıýdjetten 888,2 mln teńge bólinbekshi. Bul qosymsha taǵy 10 jobany júzege asyrýǵa múmkindik beredi. Mamandardyń aıtýynsha, bıyl taǵy Aryqbalyq, Kırıllovka, Sovetskoe, Presnovka jáne Novoıshımka eldi mekenderinde birqatar jumystar atqarylady.

Jalpy 2020 jyly SQO-da 52 myń turǵyny bar 9 eldi mekende 18 joba júzege asyrylady dep josparlanǵan.