SQO-da «Aýyl - El besigi» baǵdarlamasy aıasynda 3 eldi meken halqynyń turmysy jaqsarady
PETROPAVL. QazAqparat - Soltústik Qazaqstan oblysyna «Aýyl - El besigi» baǵdarlamasy aıasynda respýblıkalyq qazynadan bólingen qarajat óńirdegi úsh eldi mekenniń ınfraqurylymyn jaqsartýǵa jumsalmaqshy, dep habarlaıdy QazAqparat tilshisi.
Aýyl turǵyndarynyń turmysyn jaqsartý maqsatynda bıyl el bıýdjetinen SQO-na 2,1 mlrd teńge bólindi. SQO Ekonomıka basqarmasy mamandarynyń málimetinshe, bul qomaqty somanyń bir bóligi aldymen 10 myńǵa jýyq turǵyny bar Saýmalkól eldimekenine jumsalmaq. Imantaý-Shalqar kýrorttyq aımaǵynda ornalasqandyqtan aýyldyń bolashaǵy zor. Qonaqtar, sonyń ishinde sheteldik týrıster jıi keledi. Byltyr jaz mezgilinde «Nur-Sultan - Saýmalkól» baǵytynda elektrpoıyzy júre bastady. Bolashaqta eldimekenge shaǵyn qala mártebesin berý josparlanǵan.
Qarajattyń bir bóligi 12,4 myń turǵyny bar, oblys ortalyǵyna tıip turǵan Beskól jáne 3,7 myń turǵyny bar Aqjar aýdanynyń ortalyǵy Talshyq eldimekenderine jumsalmaq.
Máselen jospar boıynsha Saýmalkólde ortalyq qazandyqqa jylý jelisi tartylady. Dene shynyqtyrý-saýyqtyrý kesheni salynyp, eldimekendegi mektep-gımnazııanyń basseıni jáne Aıyrtaý ortalyq aýrýhanasynyń negizgi ǵımaraty kúrdeli jóndelmek. Sondaı-aq úsh mektepte aǵymdaǵy jóndeý júrgiziledi.
Beskólde 1,7 km jylýdy taratýshy toraby salynyp, nátıjesinde 40 úı, balabaqsha men 2 kópqabatty úı ortalyqtandyrylǵan jylý júıesine qosylady. Al Talshyq aýylynda dene shynyqtyrý-saýyqtyrý kesheniniń qurylysy bastalady. Budan basqa kólik ınfraqurylymy jaqsaryp, eldimekenderdiń kósheleri jóndelip, jaryqtandyrylmaq. Mamandardyń aıtýynsha Jalpy «Aýyl - el besigi» jobasy aıasynda 300-den astam jumys orny qurylmaqshy.
