SQO-da aýyl áıelderi zeınetke shyǵý jasyn tómendetýdi surady
«AMANAT» partııasy SQO fılıaly baspasóz qyzmetiniń málimetinshe, Parlament Májilisiniń depýtaty Dmıtrıı Koloda Aqqaıyń aýdany Astrahanka aýylynda turǵyndarmen kezdesý ótkizdi. Maqsat – el Konstıtýtsııasyna engiziletin túzetýler jaıynda aıtyp, aldaǵy referendým jóninde halyqtyń oıyn bilý.
Kezdesý barysynda turǵyndar belsendilik tanytyp, májilismenge Áleýmettik kodekske ózgerister engizýge qatysty kóptegen suraq qoıdy. Solardyń biri – Astrahanka eldi mekeniniń turǵyny Gúlmıra Qabanbaeva áıelderdiń zeınetke shyǵý jasyn 63-ten 58 jasqa deıin tómendetý kerek dep esepteıdi.
«63 jas áıel adamǵa kóp dep oılaımyn. Ásirese aýyldaǵy áıelder tez qartaıady. Bala týady. Olardyń kútimi bar. Densaýlyǵyna baılanysty 58 jas bolý kerek», - dedi Gúlmıra Qabanbaeva.
Májilis depýtatynyń aıtýynsha, bul máseleni qaraý týraly áıelderden Parlamentke kún saıyn ótinish túsedi. Qazirgi ýaqytta áılderdiń zeınetke shyǵý jasyn tómendetý boıynsha arnaıy qujat ázirlenýde.
«Biz osy baǵytta jumys istep jatyrmyz. Másele qaralady. Ol arnaıy Áleýmettik kodekske engiziletin bolady. Qazir ony Úkimet jasap jatyr. Jyl sońyna deıin qujat Parlamenttiń qaraýyna usynylýy tıis», - dep atap ótti Dmıtrıı Koloda.
Májilis depýtaty aýyl turǵyndaryna 5 maýsymda ótetin búkilhalyqtyq referendým týraly egjeı-tegjeıli aıtyp berdi. Ol turǵyndardy osy mańyzdy sharaǵa qatysýǵa shaqyrdy. Dmıtrıı Kolodanyń aıtýynsha, Konstıtýtsııaǵa engiziletin ózgerister halyqtyń ómirine tikeleı qatysty jáne ómir súrý sapasyn jaqsartýǵa baǵyttalǵan.
Buǵan deıin QR Premer-Mınıstriniń orynbasary Eraly Toǵjanov ta áıelderdiń zeınetke shyǵý jasyn tómendetý máselesi Áleýmettik kodeks aıasynda talqylanatynyn aıtqan edi.
