SQO-da aýtızmdi erte dıagnostıkalaý men otbasylardy qoldaý júıesin qaıta qaraý usynyldy
PETROPAVL. KAZINFORM — Soltústik Qazaqstan oblysynda kishkentaı balalardaǵy aýtızm men psıhıkalyq buzylystardy erte dıagnostıkalaýdyń tıimdi tetiginiń joqtyǵy talqylandy.
«AMANAT» partııasy SQO fılıalynyń málimetinshe, bul másele múmkindigi shekteýli balalarmen aınalysatyn jeke uıymdardyń basshylarynyń kezdesýinde aıtyldy.
«Moı rebenok» qoǵamdyq birlestiginiń basshysy Tatıana Kovalevanyń aıtýynsha, qoldanystaǵy klınıkalyq nusqaýlar jańartylsa da, jalpy tájirıbe dárigerleri, nevropatologtar jáne pedıatrlar kishkentaı balalardaǵy aýtızmniń belgilerin árqashan birden anyqtaı bermeıdi, tıisti tekserýlerge baǵyttamaıdy jáne erte aralasýdy bastamaıdy.
— Bala ómiriniń alǵashqy jylynda-aq pedıatr onyń damýyndaǵy erekshelikterdi baıqap, shara qoldanýy tıis. Alaıda, ókinishke qaraı, bul júzege aspaı otyr. Tekserýden ótýge, mamandarǵa joldama berilmeıdi, saýalnama júrgizilmeıdi. Saldarynan baǵa jetpes ýaqytty joǵaltyp jatyrmyz, — dedi Tatıana Kovaleva.
Іs-sharaǵa jınalǵandar bastapqy medıtsınalyq kómek kórsetý kezinde mindetti túrde paıdalanylatyn biryńǵaı dıagnostıkalyq algorıtmdi iske qosý týraly usynys aıtty. Bul algorıtmge ata-analarmen saýalnama júrgizý jáne tekserý sharalarynyń kólemin ulǵaıtý kiredi.
— Zańdarǵa ózgeris engizýdiń qajeti joq, bul máseleni atqarýshy organdar deńgeıinde sheshý kerek. Biraq is júzinde jaǵdaı múldem basqasha. Sondyqtan máseleni sheshýge atsalysaıyq. Bul — sheshimin tabatyn másele, alaıda ol muqııat taldaý men júıeli tásildi qajet etedi. Kadrlar, ádistemeler jáne dıagnostıkalyq quraldar boıynsha da senimdi negiz bolýy mańyzdy, — dedi «AMANAT» partııasynyń hatshysy Sholpan Karınova.
Jıynǵa qatysýshylar balalaryna alǵash ret dıagnoz qoıylǵan ata-analardyń da kóptegen máselemen betpe-bet keletinin aıtty. Osyǵan baılanysty «Kómek» ortalyǵynyń jetekshisi Ǵalııa Baıazıtova aımaqta erekshe balalary bar ata-analarǵa arnalǵan arnaıy qoldaý mektebin ashýdy usyndy.
— Dıagnoz qoıylǵannan keıin kóptegen ata-anada qorqynysh paıda bolyp, ózin kinálaıdy, aqparattyń azdyǵynan ne isterin bilmeı qalady. Biri jumysynan shyǵyp ketedi, biri otbasynan ketip qalyp jatady. Bizge júıeli, qaýipsiz jáne qoldaıtyn orta qajet, — dedi Ǵalııa Baıazıtova.
Buǵan deıin dárigerler aýtızmdi erte anyqtaýdyń mańyzy jaıynda aıtqan edi.