SQO-da aýtızm ortalyǵynda bilim alýǵa 250-den astam bala kezekte tur
PETROPAVL. KAZINFORM – Soltústik Qazaqstan oblysynda aýtızm dıagnozy qoıylǵan balalarǵa mamandandyrylǵan ortalyqtar tapshy. Byltyr ashylǵan arnaıy oqý orny qazir eki aýysymda jumys isteıdi, sonyń ózinde 253 bala áli de mamandandyrylǵan psıhologııalyq-pedagogıkalyq qoldaýǵa muqtaj.
«AMANAT» partııasy SQO fılıaly baspasóz qyzmetiniń málimetinshe, partııa janyndaǵy otbasy jáne halyqty áleýmettik qorǵaý máseleleri jónindegi óńirlik keńestiń otyrysynda ınklıýzıvti qoǵam qurý máselesi qaraldy. Oblystyq bilim basqarmasy basshysynyń orynbasary Dınara Anafınanyń aıtýynsha, jyldyń sońynda Petropavldaǵy «Bereke» shaǵyn aýdanynda salynyp jatqan №2 arnaıy mektep-ınternat qoldanysqa beriledi. Osy oqý ornynda aýtızm ortalyǵyn ashý josparlanyp otyr. Jalpy óńirde 723 bala aýtızmmen aýyrady.
«Múgedektigi bar adamdarǵa arnalǵan kótergish satyny ornatýǵa qorytyndy alyndy. Sondaı-aq úshinshi qabatta aýtızm ortalyǵyna 570 sharshy metr aýmaq bólindi. Balalarmen 17 maman aınalysady. Olar bir lekte 50 balany qamtı alady. Ortalyqqa jyl saıyn 43 mln teńge bólinedi. Bul ortalyqtyń ashylýymen biz kezek máselesin túbegeıli sheshemiz», - dedi Dınara Anafına.
Keńes barysynda múgedektigi bar adamdarǵa arnalǵan nysandardy beıimdeý, olardy jumysqa ornalastyrý jáne halyqtyń áleýmettik osal tobyndaǵy balalardyń jazǵy demalysyn uıymdastyrý máseleleri de talqylandy.
SQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Tatıana Bereskaıanyń aıtýynsha, 2027 jylǵa deıin erekshe qajettilikteri bar azamattar úshin 773 bilim berý, densaýlyq saqtaý, mádenıet, sport, memlekettik organdar jáne basqa da obektilerdi beıimdeý josparlanyp otyr. Osy jyldyń basynan bastap múmkindigi shekteýli 201 adam jumysqa ornalastyryldy. Sonymen qatar, 50 adam «Bastaý bıznes» jobasy boıynsha oqýdan ótip, óz isterin ashty.
Bıyl jazda halyqtyń áleýmettik osal tobynan 16 644 bala saýyqtyrý men demalystyń barlyq túrlerimen qamtylǵan. Olar - jetim, ata-anasynyń qamqorlyǵynsyz qalǵan, az qamtylǵan, kóp balaly otbasylardan shyqqan jáne ómirlik qıyn jaǵdaıǵa tap bolǵan jáne múgedektigi bar balalar.
Buǵan deıin SQO-da byltyr bosanǵan 6 myńǵa jýyq áıeldiń 46-sy kámelet jasyna tolmaǵanyn jazǵan edik.
