SQO-da aýtıst balalarmen aınalysatyn mamandar tapshy

PETROPAVL. QazAqparat - Sáýirdiń 2-si - Dúnıejúzilik aýtızm máselesi boıynsha aqparat taratý kúni. Osyǵan oraı elimizde 1 apta boıy aýtızmge shaldyqqan balalardyń qatysýymen túrli is-sharalar ótýde, dep habarlaıdy QazAqparat tilshisi.

SQO Aımaqtyq kommýnıkatsılar qyzmetinde ótken brıfıngte belgili bolǵandaı, Soltústik óńir - aýtıstik spektri aýytqyǵan balalar sany boıynsha respýblıkada aldyńǵy úshtikke enip otyr.

Mamandardyń aıtýynsha, SQO-da 2010 jyldan bastap aýtızm dertine shaldyqqan búldirshinder sany kúrt ósken. Osydan 9 jyl buryn tek 31 balaǵa ǵana bul dıagnoz qoıylsa, búgingi kúni olardyń sany 416-ǵa jetken. Onyń 236-sy Petropavl qalasynan.

«Byltyr Petropavldaǵy №21 orta mektepte osy dertke shaldyqqan 7 balaǵa arnalǵan qoldaý kabıneti ashyldy. Balalar sabaqtan tys ýaqytta kelip, bul jerde olardyń qabiletin damytýǵa arnalǵan jattyǵýlar jasaıdy. Bıyl taǵy qaladaǵy № 23,27,43 mektepterde de osyndaı kabınetter ashylmaqshy», - deıdi SQO ákimdigi bilim berý basqarmasy jetekshisiniń orynbasary Tatıana Protopopova.

Al oblystyq ınklıýzıvti korrektsııalyq mektep-ınternatynda 37 bala oqıdy. Petropavl qalasyndaǵy 6 balabaqshada 15 arnaıy top ashylǵan. Alaıda aýtıst balalarmen aınalysatyn mamandar tapshy. Mamandardyń aıtýynsha, qazir SQO-da jalǵyz ǵana balalar psıhıatry jumys isteıdi eken.

Búkilálemdik aýtızm máselesi týraly aqparat taratý kúnine oraı oblysta kóptegen is-sharalar josparlanǵan. Máselen, syrqat balalar A.Vınokýrov atyndaǵy sport saraıyna, teatrlarǵa, oqýshylar saraıyna saıahat jasaıdy, túrli aktsııalar men merekelik sharalar ótedi.