SQO-da aýmaǵyn ýaqtyly tazartpaǵandarǵa 2 mln teńgeden astam aıyppul salyndy
PETROPAVL. QazAqparat – Soltústik Qazaqstan oblysynda abattandyrý erejelerin buzǵandarǵa 4 myńnan astam eskertý jasaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, eskertýdi elemegenderge aıyppul salyndy. Nátıjesinde 71 adam jalpy somasy 2 mln teńgeden asatyn aıyppul tóledi. Tártip saqshylarynyń aıtýynsha, eń kóp zań buzýshylyqtar aýmaqtardy ýaqtyly tazalamaýǵa qatysty boldy. Kóshelerdi, alańdardy, joldardy jáne qoǵamdyq demalys aımaqtaryn lastaý abattandyrý erejesin buzý bolyp esepteledi. Aýmaǵyn qardan tazartý boıynsha uıǵarymdardy elemegenderge de jaýapkershilik bergilengen.
Sońǵy ýaqytta abattandyrý tártibin tek ýchaskelik polıtseıler ǵana emes, sondaı-aq qala turǵyndary da qadaǵalaıtyn bolǵan. Sońǵy aptada birneshe qoqys úıindisin baıqaǵan petropavldyqtar ony áleýmettik jelide jarııalap, dabyl qaqty. Qoldanýshylardyń biri Instagram jelisinde zırat mańynda shashylyp jatqan qoqysty sýretke túsirip, bólisken. Bul derek boıynsha polıtseıler birden shuǵyl shara qabyldady. Qoqysty tastaǵan saıajaıdaǵylar ózderi bolyp shyqty, olarǵa qatysty ákimshilik yqpal etý sharasy qoldanyldy.
Áleýmettik jeli arqyly anyqtalǵan basqa da derekter boıynsha kináliler ákimshilik jaýapkershilikke tartyldy. Jumysshy kentindegi úıilgen qoqys úshin, osy ýchaskedegi qoqysty shyǵarýǵa jaýapty uıymnyń basshysyna jazalandy. Aıyppul somasy - 40 myń teńgeden asady.
«Ýchaskelik polıtsııa ınspektorlary aýlany tekserip, halyqpen profılaktıkalyq jumys júrgizedi. PIK tóraǵalaryna belgilengen aýmaǵyn ýaqtyly tazalaý qajettigi túsindiriledi. Qoqys úıindisi úshin qoqys tasymaldaıtyn kásiporyndardyń basshylary da jaýapty. Jyl basynan beri ákimshilik jaýapkershilikke 4 623 adam tartyldy, onyń ishinde 71 quqyq buzýshyǵa aıyppul salyndy», - deıdi Jergilikti polıtsııa qyzmeti basqarmasy bastyǵynyń orynbasary Aleksandr Rozbah.
