SQO-da aýyl turǵynynyń úıinen zańsyz atyp alynǵan 5 elik tabyldy
PETROPAVL. KAZINFORM – Soltústik Qazaqstan oblysynda polıtseıler «Brakoner» respýblıkalyq jedel-profılaktıkalyq is-sharasyn ótkizip jatyr.
SQO Polıtsııa departamenti baspasóz qyzmetiniń málimetinshe, tártip saqshylary 1 aqpanda bastalǵan aldyn alý is-sharasy aıasynda zańsyz ań aýlaýdyń eki faktisin anyqtady. Tártip saqshylary Taıynsha aýdanynda jedel aqparatty tekserý barysynda aýyl turǵynynyń úıinen zańsyz atylǵan bes sibir eligin tapty.
Bul derek boıynsha 43 jastaǵy er adam kúdikke ilindi. Polıtsııa qyzmetkerleri odan qarda júrýge arnalǵan tehnıka men qos uńǵyly TOZ-34 myltyǵyn tárkiledi. Aldyn ala esepteý boıynsha tabıǵatqa keltirilgen shyǵyn 7 mln teńgeden asty.
Al Aıyrtaý aýdanynda ótken birlesken reıd barysynda polıtseıler men qoryqshylar myltyq asynǵan salt attyny baıqap qaldy. Er adam qarý onyń aýylda turatyn 52 jastaǵy týysyna tıesili ekenin aıtty. Saqshylar birneshe shaqyrym júrgen soń aýyl turǵynyn jáne atylǵan úsh sibir eligin tapty. Kúdiktiniń ańshylyqpen aınalysýǵa ruqsaty bolmaǵan. Tárkilengen IJ-17 dara uńǵyly myltyǵy tirkelmegen. Qarý da, atylǵan janýarlar da tárkilendi.
Qazirgi ýaqytta zańsyz ańshylyq faktileri boıynsha qylmystyq is qozǵaldy, tergeý áreketteri júrgizilip jatyr.
Buǵan deıin SQO turǵyny órtengen úıden úsh balany aman alyp shyqqanyn jazǵan edik.