SQO-da aýyl turǵynynan qarý-jaraq arsenaly tabyldy
PETROPAVL. KAZINFORM – Soltústik Qazaqstan oblysynda Esil aýdanynyń 44 jastaǵy turǵyny úıinde birneshe myltyq, túrli kalıbrli 700 patrondy saqtap kelgen.
SQO Polıtsııa departamenti baspasóz qyzmetiniń málimetinshe, er adamnyń qarý-jaraqty saqtaýǵa ruqsat qaǵazy bolmaǵan. Tekserý barysynda polıtseıler úıden «SKS» ıir uńǵyly karabındi, tirkelmegen «IJ-K» tegis uńǵyly myltyqty jáne ańshylyq patronmen atýǵa bolatyn qoldan jasalǵan qarýdy tapty. Sondaı-aq er adamda usaq kalıbrli vıntovkanyń uńǵysy men bekitpesi, tegis uńǵyly myltyqtyń uńǵysy men túrli kalıbrli 700 patron bolǵan.
Barlyq qarý-jaraq tárkilenip alyndy, olar boıynsha saraptama taǵaıyndalady. Iir uńǵyly qarýdy saqtaý faktisi boıynsha polıtsııa qylmystyq is qozǵady. Er adamnyń bul qaýipti jıyntyqty qaıdan alǵanyn tergeý anyqtaıdy.
Kúdiktige 5 myń AEK deıingi mólsherde iri aıyppul salynýy múmkin nemese 5 jylǵa deıingi merzimge bas bostandyǵynan aıyrý jazasy qarastyrylǵan.
Qazir SQO-da «Mal urysy» jáne «Quqyqtyq tártip» jedel-profılaktıkalyq is-sharalary ótip jatyr. Tártip saqshylary zańsyz saqtalǵan qarýdy óz erkimen tapsyrý ǵana qylmystyq jáne ákimshilik jaýapkershilikten bosatatynyn eske salady.
Buǵan deıin SQO turǵynynan sırek kezdesetin kóne myltyq tabylyp, tárkilengenin jazǵan edik.