SQO-da aýyl turǵyndarynyń arasynda qan aınalym júıesi aýrýlary birinshi orynda tur
PETROPAVL. KAZINFORM - Soltústik Qazaqstan oblysynda qazirgi ýaqytta turǵyndarǵa on kóshpeli medıtsınalyq keshen qyzmet kórsetip keledi.
SQO densaýlyq saqtaý basqarmasynyń málimetinshe, mobıldi medıtsınalyq brıgadalar 120 eldi mekenge baryp, Aıyrtaý, Aqjar, Qyzyljar, Jambyl, Taıynsha, Ýálıhanov aýdandarynyń, sondaı-aq Ǵabıt Músirepov pen Shal aqyn aýdandarynda 15 myńnan astam turǵyndy medıtsınalyq tekserýden ótkizdi.
Budan bólek, Aqqaıyń, Tımırıazev, Esil, Mamlıýt jáne Maǵjan Jumabaev aýdandarymen de qyzmet kórsetý jóninde kelisimsharttar jasalǵan.
- Úsh aı ishinde kóshpeli medıtsınalyq keshenniń beıindi dárigeri 4 myńnan astam konsýltatsııa ótkizdi, 12 myń medıtsınalyq zertteý júrgizdi. Tekserý barysynda dárigerler 660 turǵynnan túrli aýrýlardy anyqtap, bul jalpy tekserilgenderdiń 4,3 paıyzyn qurady. Sondaı-aq 73 adam dıspanserlik esepke alyndy, - deıdi mamandar.
Anyqtalǵan aýrýlardyń ishinde qan aınalymy júıesi aýrýlary birinshi orynda tur, tekserilgenderdiń 20% anyqtalǵan. Sondaı-aq, balalar arasyndaǵy aýrýlar - 13,5%, qant dıabeti - 2,6%, al glaýkoma - 0,4% qurady.
Mamandardyń aıtýynsha, kóshpeli medıtsınalyq keshender shalǵaı aýyl turǵyndaryna sapaly medıtsınalyq kómek kórsetý úshin qoldanylady. Bul aýrýlardyń aldyn alýǵa jáne olardy erte kezeńde anyqtaýǵa múmkindik beredi.
Buǵan deıin Qyzylorda turǵyndary medıtsınalyq qyzmet sapasyna jıi shaǵymdanatynyn jazǵan edik.
