SQO-da aýyl sharýashylyǵy sanaǵy kezinde 92 myńnan astam nysan qamtylady
PETROPAVL. KAZINFORM — Soltústik Qazaqstan oblysynda aýyl sharýashylyǵy sanaǵynyń negizgi kezeńi bastalǵanǵa deıin mamandar 1-30 maýsym aralyǵynda 4 qalada jeke qosalqy sharýashylyqtaryn aldyn ala aralap shyqpaq.
Bul týraly Ulttyq statıstıka bıýrosynyń SQO boıynsha departament basshysy Jorabek Dáýrenov brıfıng barysynda aıtty. «Lıstıng» dep atalatyn bul kezeń Býlaev, Sergeevka, Mamlıýtka jáne Taıynsha qalalaryn qamtıdy. Sanaq qyzmetkerleri saýalnamadan ótýge jatatyn úı sharýashylyqtarynyń tizimderin naqtylaıdy. Bul jumys barysynda mekenjaı boıynsha turǵyndardyń shynymen turatynyn jáne jeke qosalqy sharýashylyq júrgizetinin rastaý úshin júrgiziledi.
Sanaqtyń negizgi kezeńi 1 tamyz ben 20 qazan aralyǵyn qamtıdy. Ol onlaın jáne oflaın júzege asady.
Sanaq derekteri tıimdi memlekettik saıasat qurý, aýyl sharýashylyǵy óndirýshilerin qoldaý, azyq-túlik qaýipsizdigin qamtamasyz etý jáne halyqaralyq mindettemelerdi oryndaý úshin qajet.
Aýyl sharýashylyǵy sanaǵyna kimder qatysady, birinshiden, bul — mal sharýashylyǵy, ósimdik sharýashylyǵy jáne balyq sharýashylyǵy salalarynda aýyl sharýashylyǵymen aınalysatyn sharýa nemese fermer qojalyqtaryn qosa alǵandaǵy, zańdy tulǵalar men jeke kásipkerler.
— Ekinshiden, jeke qosalqy sharýashylyq júrgizý úshin jer ýchaskeleri bar jáne/nemese mal ustaıtyn úı sharýashylyqtary. Ashyp aıtqanda, bul baqshasy bar, ózderi úshin tórt túlik ustaıtyn, qus ósiretinder, — deıdi Jorabek Dáýrenov.
Sanaqtan onlaın túrde ótý yńǵaıly bolý úshin jergilikti ákimdikter men aýdandyq statıstıka bólimsheleriniń ǵımarattarynda ózine-ózi qyzmet kórsetý aımaqtary uıymdastyrylady.
Al 20 qyrkúıek pen 20 qazan aralyǵynda ıntervıýerler úı sharýashylyqtaryn jeke-jeke aralaıdy. Sanaq qyzmetkerleri barlyq respondentti qamtýǵa mindetti. Qatysýdan bas tartqandarǵa zańnamaǵa sáıkes ákimshilik jaýapkershilik bar.
Sanaq júrgizý úshin biz jumyssyz azamattar men stýdentterdi, sondaı-aq barlyq nıet bildirgen azamattardy — 180 jýyq adamdy ıntervıýer retinde jáne 43 nusqaýshyny jumysqa tartýdy josparlap otyrmyz, olar úshin arnaıy oqý júrgiziledi.
— Qazirgi ýaqytta qyzmetkerlerdi qabyldaý naýqany júrip jatyr. Intervıýer men nusqaýshy retinde sanaqqa qatysqysy keletinderdiń barlyǵy bizdiń 1446 baılanys ortalyǵyna ótinish qaldyra alady, — deıdi departament basshysy.
SQO boıynsha barlyǵy 86 myńǵa jýyq úı sharýashylyǵyn jáne 6,4 myń aýyl sharýashylyǵy óndirýshilerin qamtý josparlanǵan.
Buǵan deıin aýyl sharýashylyǵy sanaǵyn ótkizýge 3,7 mlrd teńge qarjy jumsalatynyn jazǵan edik.