SQO-da aýyl muǵalimi tez úırenýge múmkindik beretin erekshe dombyra jasady
PETROPAVL. KAZINFORM - Soltústik Qazaqstan oblysynda ınjener-ustaz Berik Amanjol ulttyq óner men zamanaýı tehnologııany úılestirip, erekshe dombyra qurastyrdy.
Berik Amanjol Aqqaıyń aýdanyndaǵy Ý.M.Ahmedsafın atyndaǵy Sovet orta mektebinde matematıka jáne ınformatıka pánderinen sabaq beredi. Buǵan deıin Petropavldaǵy zaýyttardyń birinde ınjener bolyp eńbek etken jigit osy bilimin keıin mektepte paıdaǵa jaratqan.
- Dombyra jasaý týraly ıdeıa osydan úsh jyl buryn oıyma keldi. Ol kezde Kırov atyndaǵy zaýytta jumys istedim. Keıin mektepke aýysqan kezde tehnıkalyq bilimimdi qoldanyp, ıdeıamdy júzege asyrýǵa múmkindik týdy. Bul - qazaqtyń dombyrasyn zamanaýı tehnologııalarmen ushtastyrý nátıjesinde jasalǵan aspap. Qurylǵyny qýat berý arqyly qosamyz. Basynda mandasyp, «Meniń esimim – Dına» dep tanystyrady. Qazaqtyń ataqty kúıshici Dına Nurpeıisovanyń qurmetine «Dına» dep atadym, - deıdi Berik Amanjol.
Dombyra bir aıdyń ishinde daıyn bolǵan. Ustaz oqýshysymen birge óner tabysyn ǵylymı jobalar baıqaýynda qorǵady. Jaqynda aspapqa patent te aldy.
Dombyranyń pernelerinde jaryqdıodty shamdar ornatylǵan. Sondaı-aq basqarý pýlti bar. Qazir aspaptyń baǵdarlamasyna tórt shyǵarma - Ánuran, «Kózimniń qarasy», «Bı kúıi» jáne «Kýznechık» shyǵarmalary engizilgen.
- Pýltti basý arqyly qaı kúıdi úırenetinińizdi tańdaısyz. Sondaı-aq shyǵarmany tez, ortasha jáne baıaý oınatýǵa bolady. Ol da pýltpen qoıylady. Aspapty qosyp, qolǵa alǵan kezde pernelerde sham janyp, úırenýshige baǵyt-baǵdar berip, oryndaý sheberligin arttyrýǵa kómektesedi. Bul aspap arqyly 3-4 kúnde bir kúıdi jattap alýǵa bolady, - deıdi sheber ustaz.
Qazir oqýshylar aspapty úılerine kezekpen alyp ketip, úıde de ózdiginen jattyǵyp júr. Mektep muǵalimderi de qyzyǵýshylyq tanytqan.
Buǵan deıin Aqtaýlyq 28 jastaǵy zerger Damır Tórebaı ulttyq áshekeı buıymdardy zamanaýı úlgide jańǵyrtyp, kópshilik suranysyna ıe buıym jasaýmen aınalysatynyn jazǵan edik.
