SQO-da aýyl mektebiniń úzdik oqýshysy anyqtalyp, syılyqqa velosıped berildi

PETROPAVL. KAZINFORM – «Aýyl mektebiniń úzdik oqýshysy-2024» baıqaýynyń qorytyndysy shyǵaryldy. Jeńimpazdy anyqtaýda alǵash ret aýyl mektepteri arasynda ótken respýblıkalyq olımpıada qorytyndysy negiz boldy. Soltústik Qazaqstan oblysynda Maqsat Ómirbolatov úzdik oqýysha dep tanyldy.

Maqsat Ómirbolatov Aıyrtaý aýdanyndaǵy №1 Saýmalkól orta mektebiniń 11-synyp oqýshysy. Bilimge qumar bala 5-synyptan bastap Qazaqstan tarıhyna qyzyǵýshylyq tanytyp, ustazdarynyń qoldaýymen osy kúnge deıin túrli respýblıkalyq jarystardyń jeńimpazy atandy. Ótken oqý jylynda bozbala Aqtóbe qalasynda ótken jas tarıhshylardyń respýblıkalyq zııatkerlik baıqaýynda jáne Astana qalasynda ótken aýyl balalarynyń respýblıkalyq olımpıadasynda 1 oryndy jeńip aldy. Sondaı-aq Óskemende jalpy pánder boıynsha ótken respýblıkalyq olımpıadanyń júldegeri. Osylaısha joǵary nátıje kórsetken Maqsat Ómirbolatov SQO boıynsha aýyldyń úzdik oqýshysy atandy. «Qyzyljar daryny» ortalyǵy men SQO Bilim basqarmasy jańa oqý jylynda úzdik oqýshyǵa baǵaly syılyq - velosıped syılady. 

SQO Bilim basqarmasy baspasóz qyzmetiniń málimetinshe, Qazaqstan boıynsha osyndaı nomınatsııada tek 14 adam ǵana marapattaldy. 

Oqý-aǵartý mınıstriniń tapsyrmasymen ótken oqý jylynda alǵash ret aýyl mektepteriniń 9-11 synyp oqýshylary arasynda jalpy pánder boıynsha respýblıkalyq olımpıada ótti. Maqsat - Qazaqstannyń shalǵaı eldi mekenderinen daryndy balalardyń qabiletterin anyqtaýǵa jáne nyǵaıtýǵa baǵyttalǵan. Bilim dodasy 13 pán boıynsha ótkizilip, 3 kezeńnen turdy. Respýblıkanyń túkpir-túkpirinen 85,4 myń oqýshy qatysýǵa nıet bildirdi. SQO-dan 3,4 myń oqýshy tirkeldi. 

Olımpıada «bir kompıýter – bir oqýshy – bir kamera» qaǵıdaty boıynsha uıymdastyryldy. II kezeń (oblystyq) jeltoqsan aıynda ótti. Tapsyrmalar onlaın-platformada dástúrli olımpıadalyq tapsyrmalar túrinde usynyldy.

III kezeńniń qatysýshylary - 730 oqýshy respýblıkalyq syrttaı mektepke qabyldandy. Qorytyndy kezeńniń qorytyndysy boıynsha jeńimpazdar men júldegerler anyqtalady. SQO boıynsha jalpy 162 júldeger. Respýblıkalyq kezeńge oblystan birinshi jáne ekinshi oryn alǵan 51 jeńimpaz qatysyp, 5 altyn, 3 kúmis jáne 12 qola medal alyp, laıyqty óner kórsetti. «Úzdik olımpıadalyq marapat» nomınatsııasy boıynsha úshinshi dárejeli dıplommen marapattaldy. 
Buǵan deıin SQO aýylynda 8 ben 17 jas aralyǵyndaǵy 35 qyzdyń kúrespen aınalysyp júrgenin jazǵan edik.