SQO-da aýyl balasy sybaılas jemqorlyqqa qarsy halyqaralyq baıqaýdyń júldegeri atandy
PETROPAVL. KAZINFORM – Soltústik Qazaqstan oblysy Ǵabıt Músirepov atyndaǵy aýdannyń oqýshysy Nıkıta Avdeev «Sybaılas jemqorlyqqa birge qarsymyz!» halyqaralyq jastar baıqaýynda júldeli ekinshi orynǵa ıe boldy.
Nıkıta Avdeev Andreevka orta mektebinde oqıdy. Áleýmettik jarnama baıqaýy jaıynda ustazdarynan bilgen. Jasóspirimniń «Jemqorlyqtyń qolyna túspe!» atty jumysyn qazylar eń kreatıvti týyndylardyń biri retinde baǵalady.
- Men sybaılas jemqorlyqty qubyjyq retinde kórsettim, al onyń astynda adam tur. Ol tańdaý quqyǵyna ıe – adal ómir súrip, zańǵa baǵynady nemese jemqorlyqtyń qurbany bolady. Bul jumysym joǵary baǵalanǵanyn estigende qýanyshymda shek bolmady, - deıdi Nıkıta Avdeev.
Nıkıtaǵa baıqaýda jeńip alǵan syılyǵyn oblystyń sybaılas jemqorlyqqa qarsy qyzmet bastyǵy tapsyrdy. Mamandardyń aıtýynsha, bıyl baıqaýda rekord ornatylyp, álemniń túkpir-túkpirinen 41 myń jumys usynyldy. Bıyl oǵan BAÁ, Qytaı, Taıland, Mıanma, Brazılııa, Armenııa, Belarýs, Qazaqstan, Qyrǵyzstan, Reseı jáne Tájikstandy qosa alǵanda, 11 elden jas sýretshi qatysty.
- Bul aýqymdy konkýrs qoǵamda zańdylyq pen tártip qaǵıdattaryn nyǵaıtý, sondaı-aq jastardyń sybaılas jemqorlyq máselesine nazaryn aýdarý maqsatynda ótkiziledi.
Jas sýretshimizdiń halyqaralyq deńgeıde tanylýy – bul tek onyń jeke jetistigi ǵana emes, sonymen qatar búkil qazaqstandyq jastar úshin mańyzdy oqıǵa. Nıkıtanyń jeńisi qazirgi jastardyń sybaılas jemqorlyqqa qarsy kúrestiń mańyzdylyǵyn túsinetinin jáne azamattyq ustanymdaryn shyǵarmashylyq arqyly bildirýge daıyn ekenin kórsetedi.
Bul saıysqa oqýshylarymyz jylda qatysady, Nıkıta sııaqty jeńimpaz bolǵan balalarymyz bar, - deıdi SQO bilim basqarmasynyń bas mamany Zámzágúl Turlybaeva.
Buǵan deıin Petropavlda kózine pyshaq kirip ketken bala esin jımastan qaıtys bolǵanyn jazǵan edik.