SQO-da aýyl balasy oıyn alańyn jóndep berýdi surap, ákimdikke hat jazdy
PETROPAVL. KAZINFORM – Soltústik Qazaqstan oblysy Qyzyljar aýdany Beskól aýylynyń kishkentaı turǵyny Ildar Mýhametshın oıyn alańyn jóndeýdi surap, hat jazyp, beınerolık túsirdi.
Qyzyljar aýdanyndaǵy Beskól aýyly Petropavl qalasyna tıip tur. Keıingi jyldary eldi mekenge kóship kelýshiler sany artqan. Al bala jóndep berýdi suraǵan oıyn alańy Beskóldegi Qazaqstan jáne Jumabaev kósheleriniń qıylysynda ornalasqan.
Ildar úlkenderdiń kómegimen túsirgen beınerolıkte bárin táptishtep aıtqan.
– Bir aı buryn Qyzyljar aýdandyq ákimdigine hat jazdyq. Óıtkeni Beskól aýyldyq ákimdigi bizdiń ótinishimizge qulaq aspady. Hatta balalardyń oıyn alańyn jónge keltirýdi suradyq. Bizge barlyǵy jóndeldi degen jaýap keldi, kórelik, - deıdi jetkinshek.
Ildardyń aıtýynsha, jumys qalaı bolsa solaı istelgen, ıaǵnı átkenshekter jartylaı syrlanǵan, jóndelmegen, keıbiri durys bekitilmegen, qozǵalyp tur. Qorshaýy úzilip ketken, biraq ol jóndelmeı, jartylaı syrlanǵan. Oryndyq janyndaǵy qoqys salǵysh sol qalpy qulap jatyr. Al mańyndaǵy dárethanaǵa kirmek turmaq, janyna jaqyndaý múmkin emes.
«Mundaı jumysty qabyldaı almaımyz, qaıta isteý kerek» dep, bala ákimdiktiń jaýabyn qoqysqa tastady.
Buǵan deıin SQO-da tasqyn kezinde kvadrotsıklmen qap tasyǵan balanyń ata-anasyna aıyppul salynǵanyn jazǵan edik.