SQO-da aýyl balalaryna dıqanshylyqtyń qyr-syryn mektepten úıretpek
PETROPAVL. KAZINFORM — Soltústik Qazaqstan oblysynyń jeti aýdanynda agrosynyptar ashylady.
Bul synyptarda aýyl sharýashylyǵyna qyzyǵýshylyq tanytqan balalar oqyp, zamanaýı agrotehnologııalarmen tanysyp qana qoımaı, bolashaq mamandyǵyn erte bastan sanaly túrde tańdaýǵa múmkindik alady.
SQO bilim basqarmasynyń málimetinshe, jańa jobanyń iske qosylýy qazan aıyna josparlanǵan. Qazirgi ýaqytta daıyndyq jumysy qyzǵan.
— Bilim basqarmasynyń bastamasymen Manash Qozybaev atyndaǵy Soltústik Qazaqstan ýnıversıtetiniń agrotehnologııalyq fakýltetinde aýdan mektepteriniń muǵalimderimen kezdesý ótti. Qatysýshylar agrosynyptardyń damýy, baǵdarlamalardyń mazmuny, praktıkalyq daıyndyq múmkindikteri jáne odan arǵy yntymaqtastyq máselelerin talqylady.
Bul pılottyq joba Qazaqstan Respýblıkasynda Mal sharýashylyǵyn damytýdyń 2026-2030 jyldarǵa arnalǵan keshendi josparyna engen. Oqýshylar jańa oqý jylynda oblystyń 7 aýdanynda «Agronomııa/ósimdik sharýashylyǵy» jáne «Mal sharýashylyǵy» baǵyttary boıynsha agrosynyptarda bilim alady, — deıdi basqarma ókilderi.
Jańa joba jergilikti ýnıversıtettiń agrotehnologııalyq fakýltetimen jáne aýyl sharýashylyǵy taýarlaryn óndirýshilermen júzege asyrylady. Áriptes uıymdar sheberlik synyptaryn, óndiristik ekskýrsııalardy, praktıkalyq sabaqtardy ótkizýdi, tálimgerlikti, mamandardyń bilim berý protsesine qatysýyn qamtamasyz etpek.
Buǵan deıin elimizde bıylǵy 1 qyrkúıekten bastap shaǵyn jınaqty mektepterge jasandy ıntellektini engizý boıynsha pılottyq joba iske qosylǵanyn jazǵan edik.
