SQO-da aýyl ákimi qoǵamdyq orynda mas júrgeni úshin jazalandy

PETROPAVL. KAZINFORM – Soltústik Qazaqstan oblysynda ádep jónindegi keńestiń kezekti otyrysynda aýyl ákimderiniń tártibi sóz boldy.

Ádep jónindegi keńes hatshylyǵy Aqjar aýdandyq prokýratýrasy materıaldarynyń negizinde Kishiqaraoı aýyldyq okrýginiń ákimi Botagóz Sabyrovaǵa qatysty qyzmettik tekseris júrgizdi.

Prokýratýranyń qaýlysyna sáıkes, Bostandyq aýylynda ornalasqan Kishiqaraoı aýyldyq okrýgi ákimdigi ǵımaratynda ýchaskelik polıtsııa ınspektorynyń kabıneti, aýyldyq kitaphana, veterınarlyq dáriger jáne poshta tasýshynyń kabınetteri ornalasqan. Poshtashy belgilengen talaptarǵa qaıshy munda saýda-sattyqpen de aınalysyp kelgen. Osy úshin aýdandyq polıtsııa qyzmetkerleri sáýir aıynda ony eskertý túrindegi ákimshilik jaýapkershilikke tartqan. Al mamyr aıynda aýdandyq sot poshtashyny kináli dep taýyp, 60 myń teńgege jýyq aıyppul salǵan.

Qyzmettik tekseris barysynda Botagóz Sabyrova atalǵan zańsyz saýdany bilgenin, biraq óz tarapynan áreket etpegenin moıyndady. Ádep keńesiniń músheleri bul joly oǵan qatysty eskertýmen shektelýdi usyndy. 

Al Ǵabıt Músirepov aýdany Lomonosov aýyldyq okrýginiń ákimi Vıacheslav Barsýkovtyń tártiptik isi Ádep jónindegi keńeste osymen úshinshi ret qaralyp otyr. Bul joly ol qoǵamdyq orynda mas kúıde júrgen. 

— 31 mamyr kúni túngi saǵat 00.00 kezinde Petropavldaǵy «Avrora» saýda úıiniń mańynda Barsýkov táltirektep kele jatqan. Polıtsııa qyzmetkeri ony toqtatyp, tekserý kezinde mas ekeni anyqtaldy. Ákimshilik kodekstiń 440 babynyń 1-tarmaǵy (qoǵamdyq orynda alkolgol ishý, mas kúıde júrý) boıynsha hattama toltyrylyp, aıyppul salyndy. Aıyppul qysqartylǵan tártippen tólendi, — deıdi QR Memlekettik qyzmet isteri agenttigi SQO boıynsha departamenti basqarmasynyń bas mamany Darhan Ermekov. 

Aýyl ákimi túsiniktemesinde sol kúni dámhanadan shyǵyp, taksıge bettegen sátinde janynan ótip bara jatqan patrýldiń toqtatqanyn aıtty. 

— Medıtsınalyq kýálandyrý meniń jeńil dárejede mas bolǵanymdy kórsetti, ıaǵnı táltirektegen joqpyn. Polıtsııa patrýliniń qasynan ótip bara jatqanda toqtatty. Iıa, óz kinámdi moıyndaımyn. Sol kúni spartakıadaǵa qatysý úshin oblys ortalyǵyna kelgen edik, — dedi Vıacheslav Barsýkov.

Ádep jónindegi keńeste memlekettik qyzmetshige qatań sógis jarııalaý usynyldy. 

Buǵan deıin Petropavlda jańa shaǵyn aýdan men 28 kóshege ataý berilgenin jazǵan edik.