SQO-da aýyl ákimi 4 mln teńgege sapasyz kóshet alǵan
PETROPAVL. KAZINFORM — Memlekettik qyzmet talaptaryn buzǵan Soltústik Qazaqstan oblysy Tımırıazev aýyldyq okrýginiń ákimi Maqsat Nýrıkenovtiń isi tártiptik keńeste qaraldy.
Prokýratýra usynǵan materıaldarǵa sáıkes, 2025 jylǵy 5 qarashada aýyldyq okrýg ákimdigi men «Jasyl Orman» jeke kásipkerligi arasynda memlekettik satyp alý týraly kelisimshart jasalǵan. Kelisim boıynsha 100 myń dana qylqan japyraqty kóshet satyp alýǵa 4 mln teńge bólingen.
Tekserý barysynda birqatar zań buzý anyqtalǵan. Atap aıtqanda, kóshetterdi qabyldaý senimhat berilmegen tulǵa arqyly júrgizilgen. Sondaı-aq, taýar sapasyn rastaıtyn — sáıkestik sertıfıkattary, fıtosanıtarlyq anyqtamalar, shyǵý tegi týraly málimetter jáne basqa da qujattar usynylmaǵan. Soǵan qaramastan, byltyr 19 qarashada jetkizýshige 4 mln teńge tolyq kólemde tólengen.
Prokýratýra júrgizgen vızýaldy tekserý nátıjesinde otyrǵyzý materıalynyń sapasy talapqa saı kelmeıtini anyqtalǵan. Kóshetterdiń dińderi qısyq, búrshikteri tolyq qalyptaspaǵan, sondaı-aq túrli zaqym belgileri baıqalǵan. Muny «Zverıachenko T.S.» jeke kásipkerligi júrgizgen zertteý qorytyndysy da rastady. Zertteý barysynda bes kóshet alynyp, olardyń tamyr júıesi talapqa sáıkes kelmeıtini, al birjyldyq kóshetterdiń búrshikteri tolyq jetilmegeni jáne aıazdan zaqymdanǵany belgili boldy. Osylaısha usynylǵan kóshetterdiń birde-biri tehnıkalyq talaptarǵa saı emes dep tanyldy.
Sarapshylardyń qorytyndysyna sáıkes, mundaı sapadaǵy kóshetter ormandy qalpyna keltirý jáne kógaldandyrý jumystaryna jaramsyz.
Qyzmettik tekserý barysynda aýyl ákimi Maqsat Nýrıkenov kóshetterdi tıisti qujattarsyz qabyldap, tólem jasaǵanyn moıyndady.
Osylaısha, onyń áreketterinen sheshim qabyldaý kezinde jeke jáne zańdy tulǵalarǵa negizsiz artyqshylyq berý faktisi bolǵan.
Maqsat Nýrıkenov bul qyzmetke 2023 jylǵy 28 qarashada taǵaıyndalǵan. Buǵan deıin tártiptik jazaǵa tartylmaǵan.
Buǵan deıin Qyzylordada qylmystyq qýdalaý organdarynyń 404 qyzmetkeri tártiptik jazaǵa tartylǵanyn jazǵan edik.