SQO-da aýdandyq ІІB-niń eks-basshysy bes jylǵa sottaldy

PETROPAVL. QazAqparat - Petropavl qalalyq sotynda Taıynsha aýdany ishki ister bóliminiń burynǵy basshysy Petr Martynıýkke qatysty úkim shyǵaryldy, dep habarlaıdy «QazAqparat» HAA tilshisi.

Burynǵy polıtseıge QR QK 190-baby 3 bóliginiń 1,2 tarmaqtary «Alaıaqtyq» boıynsha aıyp taǵyldy. Tergeý materıaldarynan keltirilgen derekterge súıensek, aýdandyq ІІB basshysy laýazymynda júrip ol E.Antaevqa qatysty qylmystyq isti jeńildetip bermekshi bolǵan. Óz qyzmetin asyra paıdalanǵan tártip saqshysy usynǵan «qyzmeti» úshin E.Antaevtiń aǵasynan 1,8 mln teńge talap etken.

«QR QK 190 baby 3 bóliginiń 1,2 tarmaqtary «Alaıaqtyq» boıynsha kináli  dep tanylǵan Petr Martynıýkke múlki tárkilene otyryp 5 jylǵa bas bostandyǵynan aıyrý jazasy taǵaıyndalsyn. Memlekettik qyzmette jumys isteý quqyǵynan ómir boıy shettetilip, «polıtsııa polkovnıgi» arnaıy  sheninen aıyrylsyn», - dep Petropavl qalalyq sotynyń sýdıasy Almas Jumaǵazın úkimdi oqydy.