SQO-da aýdandyq aýrýhananyń býhgalteri 20 mln teńge jymqyrǵan
Ekonomıkalyq tergeý departamentiniń málimetinshe, aýrýhananyń esepshottarynan qarjynyń urlanǵandyǵy jóninde sáýir aıynda anyqtalǵan. Nátıjesinde «Alaıaqtyq» baby boıynsha qylmystyq is qozǵaldy.
«Qylmystyq isti tergeý barysynda 2016 jyldyń qańtary men 2018 jyldyń jeltoqsany aralyǵynda aýdandyq aýrýhananyń býhgalteri qyzmet babyn paıdalanyp, respýblıkalyq bıýdjetten túsken qarjyny óziniń jeke esepshotyna aýdaryp otyrǵan. Ol aqsha kásiporynnyń qalypty jaǵdaıda jumys isteýine jáne qyzmetkerlerge eńbekaqy tóleý úshin bólingen», - deıdi departament mamandary.
Úsh jyldyń ishinde aýdandyq aýrýhana býhgalteri jalpy somasy 20,8 mln teńgeni jymqyrǵan. Ol kelgen shyǵyndy tolyǵymen ótedi. Sot eks-býhgalterdi aıypty dep tanyp, 3 jylǵa shartty túrde jaza kesti. Sondaı-aq ol 5 jylǵa deıin materıaldyq jaýapkershiligi bar qyzmetterge ornalasa almaıdy.