SQO-da aýdandyq mańyzy bar joldar shamamen 600 km-ge qysqardy

PETROPAVL. KAZINFORM - Soltústik Qazaqstan oblysynda byltyr jergilikti mańyzy bar 700 km jolda jóndeý júrgizilýi tıis bolsa, sonyń 480 shaqyrymynda jumys aıaqtaldy.  

SQO jolaýshylar kóligi jáne avtomobıl joldary basqarmasynyń basshysy Maqsat Baıahmettiń aıtýynsha, 1 km jol jańadan tóseldi, 46,8 km kúrdeli, qalǵanynda orta jóndeý jumysy júrgizildi.

«Eldi mekenderdegi kóshe joldary da retke keltirilip jatyr. Byltyr 40 aýylda jumys bastalyp, jyl sońyna deıin 38-inde aıaqtaldy. Nátıjesinde 80 myń turǵyn bul istiń ıgiligin kóredi. Petropavlda da alǵash ret aýqymdy jumys júrgizilip, 58 km quraıtyn 47 kóshe jóndeldi», - deıdi Maqsat Baıahmet.

Eldi mekenderdiń qysqarýyna baılanystySQO-da aýdandyq mańyzy bar avtojoldarǵa esep júrgizildi. Nátıjesinde ol 580 km qysqaryp otyr.

Basqarma basshysynyń aıtýynsha, bul jumys 2025 jylǵa deıin jalǵasady. Osylaısha taǵy 400 km qysqartý josparda bar.

Aýdandyq mańyzy bar joldyń uzyndyǵy buǵan deıin 5043 km bolsa, qazir ol 4463 km quraıdy.

«Atqarylǵan jumystyń nátıjesinde oblystaǵy joldardyń 72 % normaǵa saı keledi. Bıyl jergilikti mańyzdaǵy 570 km jolda jáne kóshelerdegi 67,9 km jolda jóndeý júrgiziledi. Birneshe iri joba qolǵa alynady, ıaǵnı Blagoveşenka-Qaırankól, Smırnov-Taıynsha jáne Pokrovka-Mektep joldary kúrdeli jóndeledi», - deıdi basqarma basshysy.