SQO-da aýdandardyń kóktemgi sý tasqynyna ázirligi tekserildi
PETROPAVL. QazAqparat – Soltústik Qazaqstan oblysynda kóktemgi sý tasqyny bolýy múmkin aýdandardyń tabıǵı apatpen kúreske ázirligi tekserildi, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, kóktemgi sý tasqyny jergilikti atqarýshy organdardyń, tótenshe jaǵdaılar departamentiniń turaqty baqylaýynda. Tasqyn sýdyń keltirer zardabyn azaıtý maqsatynda oblys ákiminiń orynbasarlary, departamentter men basqarmalardyń basshylary Jambyl, Mamlıýt, Aqqaıyń, Taıynsha, Aqjar, Esil, M.Jumabaev, Ýálıhanov, Aıyrtaý, Ǵ.Músirepov, Tımırıazev jáne Shal aqyn aýdandaryn aralap, jaǵdaıdy baǵamdady. Ózender men kólderdegi qaýipti jerlerdi qarap shyǵyp, uıymdar men sharýashylyq júrgizý nysandary bazasynda qurylǵan jáne yqtımal tótenshe jaǵdaıdy joıýǵa arnalǵan bólimshelerdiń tehnıkasy men jeke quramyn tekserdi.
Eldi mekenderdi tabıǵı apat saldarynan qorǵaý jónindegi ınjenerlik is- sharalarǵa erekshe nazar aýdaryldy.
«Búgingi tańda oblystyń eldi mekenderinen 2 mln tekshe metrge jýyq qar shyǵaryldy, uzyndyǵy 1 myń km astam qaralaý jumystary júrgizildi, 1580 sý ótkizý qubyrlary tazartyldy. Bul jergilikti atqarýshy organdardyń sý tasqynyna qarsy is-sharalardy ótkizýge tıisti jaýapkershilikpen qaraıtyndyǵyn bildiredi», - deıdi SQO tótenshe jaǵdaılar departamentiniń bastyǵy Ramıl Kamalov.
Buǵan deıin «Qazgıdromet» RMM SQOF mamandary sáýir aıyna aýa raıynyń boljamyn málim etken edi. Sınoptıkterdiń aıtýynsha, óńirde qar birinshi onkúndiktiń ekinshi jartysynan bastap qana qarqyndy erı bastaıdy.
