SQO-da aýdan turǵyndary úshin alǵashqy «Ashyq ákimdik» jumys isteı bastady
Memlekettik qyzmet isteri jáne sybaılas jemqorlyqqa qarsy is-qımyl agenttiginiń SQO boıynsha departamenti baspasóz qyzmetiniń habarlaýynsha, Petropavl qalasy ákimdiginde «Ashyq ákimdik» jobasy 2017 jyldan jumys istep keledi. Óńir aýdandarynda jobaǵa qosylǵan ázirshe Shal aqyn ákimdigi ǵana.
«Front-ofıs turǵyndarǵa yńǵaıly bolý úshin jasalǵan. Joǵary qabatta otyrǵan mamandardy birinshi qabatqa túsirdik. Bul jerde olar keńes beredi, qujattardy qabyldaıdy. Kireberiste keńseniń keńesshisi turady. Al apta saıyn ofıste aýdan ákiminiń orynbasary qabyldaý júrgizedi», - dedi Shal aqyn aýdanynyń ákimi Nurlan Esimov.
Keńsede sondaı-aq balalardyń oıyn buryshy, kútýge arnalǵan teledıdary bar zal, sý jáne tegin Wi-fi bar. Ashyq ákimdik jumysyna turǵyndar óz baǵasyn berdi.
«Aýdanda 3 myńnan astam zeınetker jáne júrip-turýy qıyn múgedek bar. Bul ózgeris olarǵa memlekettik qyzmetti alýdy jeńildetip otyr», - dedi aýdannyń Ardagerler keńesiniń tóraǵasy Turar Orazalın.
Mamandardyń aıtýynsha, endi jartylaı bosaǵan ǵımaratqa Sergeevka qalasy ákimdiginiń apparaty kóshedi. Nátıjesinde 600 myń teńge bıýdjet qarajaty únemdelmek. Bul - ǵımaratty bir jylǵa jalǵa alý somasy.
«Bul jobanyń aýdandyq deńgeıde júzege asýy «Halyq úshin memleket» qaǵıdaty boıynsha servıstik memleket qurýda mańyzy zor. Memlekettik qyzmet kórsetýde sybaılas jemqorlyqqa jol berilmeıdi. Qyzmet kórsetýshiler aldymen halyqtyń muqtajyna beıimdelip, sáıkes dress-kodty saqtaýlary kerek», - dedi Agenttik tóraǵasy.
Alık Shpekbaev aýdan ákimi apparatyna «Ashyq ákimdik» jobasyn aýdanda engizgenderi úshin alǵys bildirdi. Óıtkeni joba halyqtyń memlekettik organdarǵa degen senimin arttyrady.
