SQO-da aýany lastaýy múmkin 60 shaqty nysan baqylaýǵa alynǵan
PETROPAVL. KAZINFORM – Soltústik Qazaqstan oblysynda sanıtarııalyq-epıdemıologııalyq qyzmet atmosferalyq aýanyń jaǵdaıyn turaqty baqylaýǵa alǵan.
Vedomstvonyń málimetinshe, óńirde atmosferalyq aýaǵa zııandy zattar shyǵaratyn 59 nysan tirkelgen. Ol kásiporyndardyń 27 túrli lastaýshy zat shyǵaratyny anyqtaldy. Sonyń ishinde bul zattardyń 9-y qaýiptiliktiń 1-2 klasyna jatatyn, ıaǵnı adam aǵzasyna asa zııan keltiretin komponentter.
- Atmosferalyq aýa synamalaryn alý Qazaqstan Respýblıkasy Densaýlyq saqtaý mınıstriniń buıryǵymen bekitilgen sanıtarııalyq-epıdemıologııalyq monıtorıng júrgizý qaǵıdalary aıasynda qalanyń magıstraldyq kóshelerinde, qonystaný jáne ónerkásiptik aımaqtarynda jáne oblystyń barlyq aýdandarynda júzege asyrylady.
Júrgiziletin sanıtarııalyq-epıdemıologııalyq monıtorıngtiń tıimdiligi men sapasy sanıtarııalyq normalar men gıgıenalyq talaptarǵa, sondaı-aq tehnıkalyq reglamentter men ádistemelik nusqaýlyqtarǵa saı baǵalanady. Osy arqyly oryndalatyn is-sharalardyń nátıjeliligine taldaý jasalyp, qorshaǵan orta men halyq densaýlyǵyn qorǵaý jolynda naqty sheshimder qabyldanady, - deıdi mamandar.
Osy jyldyń 4 aıynda oblys boıynsha 9655 aýa synamasy alynǵan. Zertteý nátıjesinde Zertteý nátıjesinde 16 synamadan shekti ruqsat etilgen kontsentratsııadan asyp ketken jaǵdaılar anyqtaldy. Bul derekter boıynsha quzyrly organdarǵa tıisti sharalar qabyldaý úshin resmı usynys hattar joldandy.
Buǵan deıin Atyraýda jyl basynan beri ekologııany lastaǵandarǵa 916 mln teńge aıyppul salynǵanyn jazǵan edik.