SQO-da aýadaǵy jaǵymsyz ıispen kúreske 124 mln teńge jumsalmaq
PETROPAVL. QazAqparat – Petropavldyń aýasyn lastaǵan jaǵymsyz ıispen kúresý úshin jergilikti kásiporyn 2023 jylǵa deıin 124 mln teńge jumsamaq, dep habarlaıdy QazAqparat tilshisi.
Petropavl mańyndaǵy bıotoǵannan taraǵan kúkirtsýtek birneshe jyldan beri turǵyndardyń mazasyn alyp keledi. Kún jylyna sala jaǵymsyz ıis qalaǵa jaıylady.
Soltústik Qazaqstan oblysy Ekologııa departamentiniń málimetinshe, kúkirtsýtek ıisine qatysty másele birtindep sheshilip jatyr.
«Bıotoǵan - sarqyndy sýdy jınaqtaǵysh toǵan «Qyzyljar sý» JShS balansynda tur. Bul problema SQO-nyń 2020-2025 jyldarǵa arnalǵan ekologııalyq problemalardy keshendi sheshý jónindegi Jol kartasyna engizilgen. Kásiporyn óz qarajaty esebinen byltyr jumystardy bastady. Joba 2021-2023 jyldarǵa arnalǵan. Toǵandy tazartý úshin «Sýdyń ǵylymı-tehnologııalyq ortalyǵy» JShS-men jalpy somasy 124 mln 606 myń teńgege shart jasasty.
2021 jylǵy tamyzda sarqyndy sýdy jınaqtaǵyshty algolızatsııalaý boıynsha jumystar bastaldy, 4 myń tonna kóleminde hlorella mıkrobaldyry bıotoǵanǵa salyndy», - delingen ekologııa departamenti taratqan habarlamada.
Vedomstvonyń málimetinshe, bıotoǵanǵa jyl bastalǵaly hlorella mıkrobaldyrynyń 19 myń lıtr mólsherinde kontsentraty quıylǵan. Budan basqa ony ósirý úshin aralyq sý aıdynyna 1 myń lıtr mólsherinde sýspenzııa salynǵan.
Esterińizge salaıyq, «Qyzyljar sý» JShS bıotoǵandy tazartý boıynsha atqaryp jatqan jumystar jaıyly málim etken edi. Mamandar algolızatsııa úsh jyldan keıin ǵana, ıaǵnı tek kelesi jyly nátıje bere bastaıtynyn aıtty.
