SQO-da aýa raıyna baılanysty aldaǵy úsh táýlikke eskertý jarııalandy
PETROPAVL. QazAqparat – Soltústik Qazaqstan oblysynda aldaǵy úsh kúnde antıtsıklonnyń áserinen qatty boran turyp, aıaz kúsheıedi, dep habarlaıdy QazAqparat tilshisi.
«Qazgıdromet» RMK SQO boıynsha fılıalynyń málimetinshe, óńirde aýa raıyna baılanysty aldaǵy úsh táýlikke eskertý jarııalandy. Bul kúnderi kóp mólsherde qar jaýyp, shyǵys pen soltústik-shyǵystan soqqan jeldiń jyldamdyǵy 23-28 metrge jetedi. 12 qańtar kúni túnde aýa temperatýrasy 22-27 gradýsqa deıin tómendese, al kúndiz 19-24 gradýs aıaz bolýy yqtımal.
«12 qańtar kúni jeldiń jyldamdyǵy sekýndyna 28 metrge deıin jetedi. Al 13-14 qańtar kúnderi oblys temperatýrasy Salehardtan kelgen antıtsıklonmen aralasyp, aıazdy kúnder bastalady. 13 qańtarda túnde keı jerlerde qar kóp jaýyp, aýa temperatýrasy túnde mınýs 25-30 gradýs bolsa, kúndiz 23-28 gradýs aıaz kútilýde. Soltústik-shyǵystan soqqan jeldiń kúshi sekýndyna 9-14 metrge deıin jetedi. Al 14 qańtar kúni keı jerlerde tuman, túnde mınýs 29-34 gradýs, kúndiz 23-28, keı jerlerde 31 gradýsqa deıin aıaz bolady», - deıdi «Qazgıdromet» RMK SQO boıynsha fılıalynyń bólim basshysy Gúlzat Ǵazızova.
